Page 17 - AM240710
P. 17
Diaranson, 10 Juli 2024 AWEMainta DEPORTE 17
Spaña invicto den Copa Europeo 2024
SPAÑA t’e prome pais cu a sigura nan pase pa
final di e copa Europeo 2024.
Kedando na prome luga den Grupo B, ganado
Croatia 3-0, Italia 1-0 y Albania 1-0, pasa pa
ronde di 16, gana Georgia 4-1, sigui pa cuarto
final contra di Alemania.
Tur hende a pensa cu eynan tur cos lo caba, pero
nan a gana e partido aki tambe cu score di 2-1 y
asina ey pasa p’e semi final cu a tuma luga ayera
contra di Francia. E unico pais sin a perde un
partido ainda.
Francia, cu no ta a bin ta demostra e Francia
cu tur hende conoce, cu nan hungado estelar
hungando cu nanishi kibra, semper ta keda un
pais temi den futbol. Esaki por a keda demostra
ora cu den apenas di 8 minuut di e partido, Randal
Kolo Muani ta anota e gol di bay ariba pa Francia.
Tur e Spañonan a drenta panico paso a teme loke
tabata wordo bisa, esta cu Francia por bin por la
goma y hunga nan nivel cu ta custumbra di wak
nan desplega riba veld.
Pero Lamine Yamal, cu diasabra awo ta cumpli 17
aña, ta empata e partido na di 21 minuut y despues
di apenas 4 minuut su compañero Dani Olmo ta
hinca esun di bay ariba. Yamal asina aki ta bira e
hungado di mas hoben pa subi veld den un semi
final di Euro Cup, mas ainda ta bira e hungado di
mas hoben pa anota un gol den Euro Cup.
Di eynan, Spaña a cuminsa cu nan tactica di
semper, mantene e bala den nan poder, yega te
dilanti gol buscando un oportunidad, pero si no
ta haya esaki, ta hiba e bala bek patras na nan
portero kende ta calma tur cos y ta bolbe purba
un atake. Francia a haya algun oportunidad, pero
e defensa di Spaña tabata bon planta dilanti e
porteria y tabata defende esaki debidamente.
Awo Spaña lo bay sinta warda e ganado entre
Hulanda y Inglatera cu lo ta enfrentando otro awe
tardi pa 3or. Por nota e locura rond di Aruba ora
Hulanda ta hungando y principalmente ora nan
gana. Nos lo wak un final Spaña contra Hulanda?
Un revancha pa Hulanda, mirando cu Spaña a gana
nan 1-0 den mundial na 2010? Nos lo wak diado-
mingo pa 3or di atardi, caminda e final di Euro Cup
lo wordo hunga!
