Page 16 - Diario.Solo Di Pueblo, Bondia
P. 16
DIALUNA 24 AUGUSTUS 2015
Un total di 211 studiante di MAVO a drentaPAGINA16 DIARIO
HAVO e aña aki
ORANJESTAD(AAN): Recientemente Minister
di Enseñansa, Michelle Hooyboer-Winklaar a oficialisa normanan
nacional cu ta determina e criterio di admision pa studiantenan
procedente di MAVO por drenta HAVO 4 pa continua nan
estudio. Esaki despues di hopi aña di discusion entre SMOA/Colegio
Arubano y Gobierno y otro instancianan den enseñansa. Awor
normanan ta uniforme y ta aplicabel pa ambos HAVO, pues tanto
esun na Oranjestad como tambe esun na San Nicolas.
Minister Michelle Hooyboer-Winklaar a ricibi informacion for di
Colegio Arubano y Colegio San Nicolas tocante di cuanto alumno
di MAVO a drenta HAVO. Na Colegio Arubano (Oranjestad), un
total di 73 graduado di MAVO a drenta HAVO 4 y na Colegio San
Nicolas un cantidad di 61 graduado di MAVO a drenta HAVO 4
y 77 a drenta e trayecto di 3 aña di HAVO. Pues na tur ta conta
un total di 138 studiante. Esaki ta un aumento considerabel di 65%
na Colegio Arubano si compara cu aña pasa 44 graduado di MAVO
a drenta HAVO 4 na Colegio Arubano.
“Mi ta hopi contento pa mira e progreso aki y ta mira dos
factor cu a contribui na esaki. Na prome luga, miho resultado
den slaagingspercentage na MAVO aña pasa y banda di esaki e
introduccion di nos normanan nacional”, asina e Minister encarga
cu Enseñansa a enfatisa. “Tur awor ta studiantenan di HAVO y
mi expectativa ta cu cada scol lo trata e studiantenan aki como
studiantenan cu merece y tin derecho pa studia na nan scol.
Bisando esaki, mi ta sigur cu lo tin momentonan dificil pa algun
y ta keda na cada scol pa yuda e studiante pa ta exitoso mescos cu
cualkier studiante cu a cuminsa den HAVO for di prome dia. Esaki
ta e tarea di nos maestronan y e satisfaccion pa realmente facilita
studiantenan cu e asistencia unda ta necesario”. E cantidad di 211
studiante ta representa mas o menos 1/3 di e total cu ta gradua
for di MAVO cada aña. “Naturalmente esaki ta un bon start y
mi lo desea di mira mas studiante cu tin e aspiracion pa sigui nan
estudio na HAVO drenta y completa esaki pa por eventualmente
habri mas oportunidad na nivel di enseñansa superior. Haci boso
best!”, Minister Michelle Hooyboer-Winklaar a termina bisando. 
