Page 6 - HOH

Minister Dangui Oduber: Pabien SVb Cu Lansamento

Oficial Di E Webportal MiSVb 2.0

 Featured
- 17/11/2019

Diabierna atardi Minister di Salubridad Publico sr. Dangui Oduber a acudi na Banco
Social di Aseguradonan (SVb) San Nicolas p’e lansamento di e webportal MiSVB2.0.
E mandatario a duna un discurso caminda el a enfoca riba e vision pa brinda un servicio
moderno n’e aseguradonan por medio di tecnologia.

“Mi a nota cu SVb ta un organisacion hopi dinamico cu ta purba continuamente di trece
solucion y cambionan den cada departamento. Mi ta orguyoso di con e vision di 2020 pa
SVb ta bayendo y cu tur cos ta canando segun plan” tabata palabranan di e mandatario.
Tecnologia rond mundo ta avansa hopi liher y pesey mes SVb mester keda proactivo
p’asina uza cambionan na beneficio di SVb.
Cu e cambionan aki SVb lo funciona na un manera mas eficiente y cu transparencia p’e
sociedad.
SVB tin e deber pa administra e fondonan adecuadamente y cu confiabilidad, pa mantene
e fondonan financieramente sostenibel.

E webportal, MiSVB 2.0, t’e prome paso solido pa SVb den e proceso di digitalisacion di
nan servicionan. Mediante e plataforma digital aki, SVb ta comunica mas rapido y ta
brinda su clientenan aceso na tur informacion cu SVb ta maneha den cuadro di e relacion
SVb-cliente. Den SVB su vision 2020, SVb a propone su mes pa transforma di un
organisacion tradicional, burocratico y cera pa uno moderno, acesibel y transparente.
E medio pa logra e transformacion aki ta digitalisacion asina e mandatario a duna di
conoce.