Page 15 - AM210413
P. 15
Diamars, 13 April 2021 AWEMainta 15
Rumannan conoci pa Polis a bolter
cu nan auto durante un persecusion
DIALUNA madruga Polis a wordo solicita na un adres den
Madiki unda un of mas persona tabata tira piedra y boter riba e
cas. Habitantenan a informa Polis di un persona para pafo y cu e
buscando problema.
Polisnan a yega, pero ya esnan buscando problema a bandona e
sitio. Tur esaki pasando durante TDQ.
Un patruya atento di Santa Cruz a spot e auto, cu ta un Kia Rio shinishi
altura di Cas Casuela bayendo nort. Aki a start un persecusion.
Den e Kia Rio tabatin dos hende homber cu a resulta di ta dos ruman
Boekhoudt conoci pa Polis, nan tabata bayendo Santa Cruz unda nan
ta biba. Esaki tabata e mesun personanan cu a bay busca problema
den Madiki.
Durante e persecusion nan a sigui riba e caminda di Tanki Leendert
bay pariba, na rotonde di Paradera nan a bay nort direccion Babijn.
Dado momento riba e caminda aki nan a paga e luz di e vehiculo y
siguiendo cu velocidad halto direccion Sero Crystal.
Loke e dos rumannan no a tene cuente cu ne tabata e bocht entre
Sero Crystal cu Koeriboeri.
Ey nan a perde control y bolter cu e auto.
Y di e manera aki Polisnan a sa di arestanan. Ningun di dos a sufri
daño personal. Pero habitantenan si a pasa den un susto grandi dor
di e zonido fuerte. Polisnan a pone ambos riba suela wardando
transportwagen.
Ora cu transportwagen a yega a pone un prome den e van, mientras
e otro ruman si Polis mester a trata cu ne mas fuerte debi cu e no
tabata coopera momento cu nan a bay hinke den e van. Takelwagen
a wordo solicita pa a bolter e auto y hiba Warda di Polis.
