Page 46 - HOH
P. 46
ORANJESTAD (AAN): No necesariamente un PSA Test (Prostate Specific Antigen) halto
den sanger, kiermen cu un persona tin cancer di prostaat. Asina Presidente di
Fundacion Contra Cancer di Prostaat (FCCP), Jurgen Benschop a indica.
E fundacion ta hopi contento cu e acogida di nan campaña unda un promedio di 170
persona a haci test y a bin resulta cu mas di 30 persona nan test a sali halto.
Esaki ta duna un indicacion cu tin algo fout cu e prostaat. Esey ta nifica cu e persona tin
cu bay su docter di cas y un urologo pa sigui haci testnan mas avanza, Benschop a
remarca.
Comunidad, a agrega, a bira mas conciente riba kico un PSA test ta y pakico mester
haci’e. E fundacion ta organiza charlanan regularmente durante henter aña.
Pa e proximo simannan tin peticion pa tres charla, inclusive un charla grandi di AZV cu
nan ta bay anuncia pronto. Nan ta haya peticion pa charlanan di diferente organizacion.
A tene un na Brandweer luna pasa cu un sala completamente yen y cu hopi bon
reaccion.
FCCP ta envolve e pareha hopi den e asunto aki pasobra hopi biaha e pareha ta esun cu
ta pusha su partner pa bay haci un test. Si por logra esey, cu hende muher ta bira
conciente den esaki, e ta kere ci sigur sigur lo haya e hende hombernan pa bay haci
test mas frecuentemente.
Un invitacion pa comunidad asisti diasabra awor, 16 di November, na e charla tocante
cancer di prostaat y cancer di pecho organiza door di Koningin Wilhelmina Fonds y
Fundacion Contra Cancer di Prostaat. Esaki lo tuma lugar na e Ballroom di Alhambra di
9 am te 11:30 am. Entrada ta gratis.
https://www.diario.aw/2019/11/un-psa-test-halto-no-necesariamente-kiermen-cu-un-persona-tin-
cancer-di-prostaat/
