Page 17 - WEB

Den anticipacion pa e continuacion di e reunion di parlamento pa trata e ley di
Serlimar, ATIA kier a duna un reaccion riba e implicacionan di e ley aki. Prome
cu e prome tanda di e reunion di Parlamento a tuma lugar, ATIA a manda varios
carta cu preocupacionan y pregunta pa Minister y a reuni cu Minister como
tambe miembronan di parlamento pa vocifera e preocupacionan y e importancia
di mantene un mercado liber caminda un level playing field lo ta e manera pa
sigura un economia stabil.

Durante e prome reunion riba tratamento di e ley di serlimar, Minister Otmar
Oduber a presenta algun cambio. Sinembargo, e esencia caminda lo crea un
posicion di competencia inhusto entre un compania estatal y sector priva, no a
wordo cambia.

Minister ta insisti cu e ley nobo no ta preveni free enterprise y cu no ta creando
un monopolio pa Serlimar. No obstante, un afvalstoffenheffing obligatorio
implicitamente ta crea un situacion di competencia inhusto. Ademas, e hecho cu
Serlimar ta ricibi un landsbijdrage di gobierno ta hasie posibel cu Serlimar por
cobra un suma mas abou pa recoge desperdicio compara cu companianan priva,
atrobe aportando na un nivel inhusto di competencia.

E introduccion di un bijzondere heffing pa turista ta sigi contribui na e aumento
di costonan pa turista cu ta bin disfruta di nos isla y cu ya caba tin algun anja ta
vocifera cu Aruba dia pa dia ta birando mas caro. E suma di e bijzondere heffing
porta riba su mes no ta uno halto, pero mester tene consideracion cu esaki no
ta e unico heffing cu nos ta pidi turistanan paga, y ta keda añadi mas y mas
cada biaha. Mester corda cu turismo ta e unico pilar economico cu Aruba ta
depende di dje y si manjan e turistanan dicidi di scohe un otro destinacion paso
Aruba a bira mucho caro, nos economia lo hanja un sla enorme.

ATIA ta sostene un plan integral pa maneho di desperdicio di nos isla y parti di
esey ta inclui sera e dump na Parkietenbos. No tin cuestion cu mester bin un
solucion pa e problematica di desperdicio riba nos isla. Sinembargo, ATIA ta
para pa comercio y un mercado liber caminda demanda y oferta ta esun cu ta
regula e mercado. ATIA no por sostene un cambio den ley cu ta obstrui e
derecho di companianan priva pa competi na un manera husto y pa ofrece
consumidor e libertad di escogencia di servicio.

Finalmente, ATIA no ta compronde dicon mester trata y pusha e aprobacion di e
ley aki cu tanto pura. Ainda tin tanto pregunta, e sosten den comunidad pa e
cambio di ley no ta grandi y siendo cu tin un alternativa temporario caminda e
bales di desperdicio ta wordo dera. ATIA ta di opinion cu lo ta den beneficio di
tur hende pa tuma e tempo necesario y traha riba un afvalstoffenverordening cu
ta forma e framework pa e ley aki y purba bin cu un solucion cu ta carga
sosten, cu ta duradero pa nos isla y beneficioso pa nos economia.