Page 7 - ATA

16 AWEMainta Dialuna, 4 Juni 2018

Freewinds y Aruba te celebra 30 aña di amistad continuo

RECIENTEMENTE e crucero Freewinds a
ser reconoci den un celebracion special den e
waf di Oranjestad, pa su 30 aniversario di su
“maiden voyage”(nabegando) y tambe pa su 30
aña consecutivo bishitando Aruba. Y esaki a bay
cu un desvela di un monument (diseña y fabrica
pa Jey Construction) special dedica na e barco.
E evento a habri cu un bunita baile di Popcorn
Dancers, sigui pa algun discurso.

Freewinds no solamente ta e crucero cu mas a
frecuenta Aruba continuamente, sino e barco cu
a y ta hunga un rol activo den e comunidad di
Aruba.

Sr. Jossy Figaroa, Director di Aruba Ports
Authority, cu tabata e orador principal na e
evento, a bisa cu “Freewinds no solamente ta un
miembro integral di nos comunidad di puerto
sino tambe un miembro di e comunidad di
Aruba den su totalidad. Durante e 30 añanan
aki Freewinds a contribui substancialmente na
nos isla. Hopi concierto,( cu colaboracion di Jani
Croes) a ser organisa a bordo pa recauda fondo
pa instancianan caritativo, cultural, deportivo
etc. Freewinds a encarga nan mes tambe cu
varios tarea humanitario pa nos comunidad”. El
a gradici e personal di Freewinds pa tin un gran
curason y cariño pa Aruba.

Kapitan di Freewinds Mike Napier a expresa
den su discurso cu Freewinds a disfruta tur e 30
añanan cu nan ta bishitando Aruba locual ta haci
cu e tripulacion ta sinti su mes na cas. Freewinds
su prome bishita na Aruba tabata na april di
1988 y desde e fecha ey Freewinds a mantene su
presencia regularmente den nos waf di Oranjestad.