Page 27 - AWEMAINTA

Diasabra, 21 December 2019 AWEMainta 27

UN SNECHI DI PALABRA DI DIOS

IV DIADOMINGO DI ADVENT

1 lect.: Is 7, 10-14
Salmo: 24
2 lect.: Rom 1, 1-7
Evangelio: Mt 1, 18-24

Nacemento di Hesucristo a bay di e siguiente manera. Maria, mama di Hesus, tabata
comprometi cu Hose, ma a resulta cu el a sali na estado prome cu nan a casa. Esey a

sosode via di Spirito Santo. Como Hose tabata un homber husto y no kier a pone
Maria su cara na berguensa, el a plania pa bandon’e den silencio. Mientras e tabata
pensa riba e asunto aki, un angel di Señor a aparece na dje den soño y bis’e: “Hose,

descendiente di David, no tene miedo pa tuma Maria como bo casa, pasobre e yiu cu e
ta spera ta di Spirito Santo. Lo e duna luz na un yiu homber y lo bo yama e yiu
“Hesus”, pasobra lo E salba su pueblo di pica.” Tur esaki a sosode pa e palabranan cu
Señor a bisa via profeta keda cumpli: “Mira, un birgen lo sali na estado y duna luz na

un yiu homber. Lo yam‟e „Emanuel‟, loke ta nifica „Dios cu nos‟.” Ora Hose a lanta
for di soño, el a casa cu Maria manera e angel di Señor a encarg’e.

Palabra di Señor!

MENSAHE

Hose un homber husto.

Sin duda Hose tabatin su propio plan di bida, pero den un Momento

tur su plannan a cay na nada. E ta haya sa cu Maria ta na estado pa
medio di obra di Spirito Santo. Hose ta consciente cu e yiu cu e ta
spera no ta di dje. E por acusa Maria di infieldad, pero e sa cu e ora

ey hende por piedr’e como un adultera. P’esey tambe Hose como
hende husto y namora den Maria ta prefera bandon’e keto keto. Pero den soño Dios a
mustr’e un otro solucion. Un angel ta bis’e cu Dios mes ta Tata di e yiu aki. Hose a

kere den e palabra di Dios revela durante di un soño y kere den version di Maria. Hose
a kere den e palabra di Dios apesar cu e tabata asina contrario na tur e logica y
naturalesa humano. Despues di e soño aki Hose a acepta Maria cu e yiu. Anto e ta
consciente cu e yiu aki ta yiu di Dios mes. E decision di Hose a exigi hopi balor y

curashi. Dios mes a curasha Hose den su decisionnan ora a bise: “No tene miedo pa
tuma Maria como bo casa....” Despues Hose a expresa su curashi y confiansa den Dios
ora e mester biaha cu Maria pa Betlehem; ora di huida pa Egipto; ora di bolbe

Nazareth y den otro momentonan di niñez di Hesus. Hose ta un ehempel di un hende
husto, hende yen di curashi, como tambe e ta un ehempel extraordinario cu ta siña nos
con nos mester acepta Hesus como Yiu di Dios. Hose ta un ehempel masha bunita di
fe y curashi. Tambe e un ehempel bunita di humildad y confiansa den Dios, caminda e

ta pone un banda tur su plannan y acepta pa Dios determina cada paso di su bida.

ORACION

Danki Señor pa e bunita ehempel di bida di santidad di San Hose.
Yuda mi imit’e cu su virtud di obediencia y confiansa pleno den Bo

palabra y bo plan divino. Amen.

PROPOSITO

Trata di subordina bo plannan na esun di Dios.