Page 33 - AVP

ORANJESTAD (AAN) – Parlamentario mr. Arthur Dowers, den conferencia di prensa, a
referi na Minister di Economia y Finanzas, mr. Xiomara Ruiz-Maduro.

Dowers a expresa cu ta momento pa e mandatario pidi su retiro pasobra e ta haciendo

un desastre na Aruba y AVP ta ripara, for di cuminzamento di su carera politico como
minister, cu e Minister Ruiz no por conta ni calcula.

E parlamentario a menciona cu for di oposicion caba aworaki ta bin dal den su cara pero

na lugar di admiti cu el a fracasa y a faya desde e tempo aya, y a bay hiba informacion
na Hulanda y pidi pa nos pais bay curatela, awe e kier bin gaña e pueblo bisa cu e ta
haciendo un bon trabao pasobra el a baha e debe.

“Señora, bo no a paga debe, Kiermen bo no por a baha debe!” Dowers a expresa. E
parlamentario a sigui bisa cu e mandatario ketobay ta cana haci debe, y e ta e unico
minister di finanzas di Aruba cu a cana fia mas placa cu tin mester.

Segun Dowers, ora cu e minister aki a sinta a pone un trampa pa AVP cay den dje, pero
e mes a cay den dje y awor ta bin resulta cu e no por cumpli cu su trabao, y e no sa
kico e ta haci, y no tin respet pe na ningun caminda.

Dowers a señala cu e señora aki ta responsable pa finanzanan publico di Aruba y el a
biaha diferente caminda y ora e ta wordo critica cu e ta biaha mucho y ta haci masha
poco, e ta contesta cu e ta biaha rond mundo pa bay drecha e reputacion financiero di
Aruba.

E parlamentario a subraya cu e reputacion financiero di Aruba tabata mucho mihor ora
cu sra. Ruiz-Maduro no tabata minister.

E ta cuestiona cu e minister a bay Haiti y Bonaire balia, na New York a saca potret
banda di un toro, y e pregunta ta con e por drecha e reputacion financiero di nos pais
door di haci tur e biahenan aki.

Tempo cu MEP a campaña cu tin un mega debe, a bin resulta cu no tin ningun mega
debe y cu awo e situacion ta mas malo cu e tabata ta. Dowers ta pidi e minister pa bin
cu un prueba so, cu e gobierno aki ta esun cu a drecha e situacion.