Page 61 - UPDATE NEWSPAPER MIN TTC - OTMAR ODUBER

Trahadornan di Parke Arikok protestando pa nan areglo di pensioen cu ta
tarda
Publication: Tuesday, 24 November 2015. Categoria: General

ORANJESTAD (AAN): E trahadornan di Parke Nacional Arikok a lanta dialuna cu poco
disgusto. Nan tin hopi tempo wardando pa keda cla cu nan areglo di pensioen. Cinco aña caba
nan ta wardando y tur biaha ta tende un version cu e lo ta kedando cla pero te awe nada.
E trahadornan te hasta a dicidi cual fondo di pensioen nan kier ta parti di dje. Nan a escoge pa
esun di Fondo di Pensioen di Sector di Turismo. Nan placa ta wordo kita tur luna y poni un
banda. Mientrastanto e areglo di pensioen mes no ta keda cla. Tin trahador cu te hasta kier tuma
nan placa bek mirando cu cinco aña a pasa y ainda nada.
E director actual a garantiza cu e placa kita di e trahadornan y tambe e placa kita for di Parke
mes ta poni riba un cuenta cu ta generando interes tambe. E intencion tabata pa purba keda cla
entrante prome di January 2015 pero e no a logra. Asina mes e director a bisa cu lo purba pa
esaki bin retroactivo.
E trahadornan a bai den protesta y kier a pidi presencia di e bestuur cu ta esun cu ta stroba y no
duna claridad na e trahadornan. E bestuur desde April a wordo pidi pa splica kico ta pasando y
papia riba e relato financiero. Nan no a presenta te awe y e trahadornan keto bai den un
incertidumbre.
E shopstewardnan di SEPPA a splica cu nan a trata tur tempo di calma e trahadornan cada biaha.
Awor si e trahadornan no por mas cu falta di claridad y a bai den protesta. E sindicato mes a bai
te Parke pa purba papia cu e trahadornan y e director pa busca un solucion y mira ki dia
finalmente e trahadornan lo keda cla cu nan areglo di pensioen.
http://www.diario.aw/2015/11/trahadornan-di-parke-arikok-protestando-pa-nan-areglo-di-pensioen-
cu-ta-tarda/