Page 7 - ROBERT CANDELARIA

A2
Diasabra 16 september 2017

E voto Latino su potencial...

ORANJESTAD - Aruba ta conoci como un isla multicultural y multilingual cu ta refleha e integracion di hendenan cu a bin di diferente pais. Nan a nacionalisa
Hulandes y nan a haci di Aruba nan luga di biba.
Segun informacion divulga pa Oficina di Censo su website (www.censo.aw), den eleccion general di dia 22 di september 2017, un total di 70.749 ciudadano
mayor di 18 aña lo por vota. Di nan 57.508 ta ciudadanonan naci den reino Hulandes , kiermen: Aruba (50.236), Corsou (2.172), Bonaire (419), Sint Maarten
(287), Sint Eustatius (70), Saba (55), Nederland (4.269).
Pero ta resta un cantidad di 13.241 ciudadano cu nan lo por vota den eleccion venidero y cu ta wordo yama como Arubiano nobo. Nan luga di nacemento ta
ubica den casi 100 pais rond mundo cu no ta partner den reino Hulandes. Algun di nan a bin for di paisnan hopi cerca di nos, manera Colombia y Venezuela.
Otronan a nace den paisnan di otro continente manera Africa y Asia. Ta e caso di un ciudadano cu a nace na Etiopia, y kende ta registra den nos censo electoral.
Den e constelacion di potencial votadonan den eleccion venidero e asina yama comunidad Latino, ta esun cu ta abarca e mayoria di ciudadanonan di afo cu por
vota. P’esey e partidonan cu lo participa den eleccion di otro siman no ta subestima e importancia cu e voto di e comunidad Latino lo por nifica den cuadro di
eleccion venidero.
Esaki sin neglisha e miembronan di otro comunidad manera China y India caminda 615 ciudadanonan naci den ambos pais tin derecho di voto den eleccion
aki. Ta asina e partidonan cu kier come di e bolo electoral aki a reforsa nan partido cu candidatonan di origen Latino. Como ehempel nos por menciona entre
otro, Jennifer Arends-Reyes (AVP), Arthur Vallejo (MEP) y Jairo Maduro De Leon (POR).
E voto Latino
Pero, cual ta e potencial di e voto Latino? Generalmente ta dificil pa diferencia cual ciudadano naci ya sea den Centro America y Sur America, pero te hasta den
e region Caribe, ta cay den e clasificacion aki.
Tin hende cu ta haci un distincion entre e hendenan cu a nace den Caribe y cu ta papia Spaño manera e Dominicanonan. Y e hendenan cu a nace den e paisnan
cu ta forma parti di Centro y Sur America. Si nos ta inclui nan tur, nos ta papiando di alrededor di 8.910 ciudadano di e regionnan aki di nos continente cu por
vota. Mientras cu tin otro cu ta identifica e hendenan di Latino America como esunnan cu a nace den e paisnan di Sur America. Si nos ta haci e distincion aki:
6286 ciudadano naci na Sur America y nacionalisa Hulandes lo por vota den eleccion aki. E mayoria di nan a nace na Colombia (4.031). E clasificacion aki ta
inclui tambe: Argentina (46), Bolivia (3), Brasil (70), Chile (13), Ecuador (51), Paraguay (4), Peru (550),Uruguay (8) y Venezuela (1510).
Mientras cu esunnan cu a nace na Centro America ta un total di 104 ciudadano cu por vota. Nan paisnan di origen ta: Costa Rica (39), El Salvador (6), Gua-

temala (9), Honduras (6), Mexico (28), Nicaragua (5) y Panama (11).
Un grupo considerabel di votado a nace den e region Caribense unda
Spaño ta nan idioma. Nan ta, Republica Dominicana (2.443), Cuba (54)
y Puerto Rico (23). Nan ta 2520 ciudadano cu nan voto so lo por nifica
cu un candidato lo por haya un stoel den parlamento. Igualmente den
Caribe mester tene cuenta cu e esunnan cu a nace na Haiti. Di nan, 756
ciudadano di origen Haitiano y residencia na Aruba tin derecho di voto
den eleccion proximo.
Mayoria hende muhe
Un dato curioso ta cu mayoria di e votadonan di origen Latino, ya sea

di Centro y/of Sur America ta hende muhe. Ta e caso pa ehempel di Colombia,
caminda di e total di votado cu a nace den e pais aki, 2.686 ta hende muhe y 1.345
ta hende homber. Ta e mesun caso cu e votadonan cu a nace na Venezuela cu ta e
di dos pais di Latino America cu mas ciudadano lo por vota den eleccion venide-
ro. Aunke e diferencia no ta mucho grandi, pero 765 ta hende muhe y 745 hende
homber.