Page 7 - HOH_Neat

AWEMainta Diabierna, 12 Februari 2016 15

Minister dr. Alex Schwengle

No ta midi
cuido medico
riba cuanto
“Likes” ta
haya riba
Facebook

Ta desaproba lastramento y
insulto riba red social

“CUIDO medico y salud di hende no ta un asunto social,

sino ta cos serio. Den mundo medico nos no ta tuma
decision basa riba cantidad di likes cu un hende haya
riba Facebook”, asina dr. Alex Schwengle, Minister di
Salud Publico y Deporte a bisa.
El a lamenta e cantidad di insulto y lastramento cu
tabatin riba red social contra specialistanan medico di
nos pais, contra Hospital y contra di dje personalmente
como Minister encarga cu salud publico.

Ta parce cu ultimo dianan ta hopi hende a sea bira
dokter of di ripiente nan conocemento riba cuido
medico a amplia di gran forma. Riba Facebook por
a lesa un cantidad di opinion y sugerencianan cu
lamentablemente no ta basa riba realidad di e caso.
Pio ainda, basa riba comentarionan di hende cu no sa
kico e caso ta ensera, mesora a sali un avalancha di
atakenan baho contra e Pediatranan encarga cu cuido
di e baby Lunah y contra e mandatario.
Specialmente e grupo conoci tras di “Fake Accounts”
mesora a activa y hasta a publica potret di henter famia
di e Minister, puntrando e si e lo a actua mescos si tabata
su yiunan.

“E tipo di actonan baho asina mi ta desaproba y mi no
a drenta arena politico p’esaki. Mi ta un profesional
medico y mi ta haci mi trabou teniendo e interes di
e paciente na cuenta pero sin lubida e derecho di e
dokternan envolvi.
E balans ey ami mester mantene y como tal mi no ta
funciona segun chantahe di ningun hende “ . Dr. Alex
Schwengle ta adverti e opositornan politico cu ta sconde
tras di cuentanan anonimo riba red social, cu e tipo di
actonan baho asina un dia lo bolbe bek y no ta agradabel.

“Si un hende no gusta mi maneho, nan por atacami
libremente, pero no mishi cu mi famia”, Minister dr.
Alex Schwengle a termina bisando cu un bos serio y
obviamente hopi disgusta.