Page 8 - FMA

Anky Vrolijk awor ta encabesa Fundacion Museo Arubano

Publication: Wednesday, 3 February 2016. Categoria: General
Cinco museo bao di un solo fundacion

ORANJESTAD (AAN): Recientemente Philippe LaReine, Presidente di Fundacion Museo Arubano, cu ta e
organisacion encarga cu maneho di cinco museo na Aruba, a introduci Anky Vrolijk como e director nobo di
Fundacion Museo Arubano.
Cu e nombramento aki e fundacion awor ta conta cu sanger hoben pa hiba e museonan di Aruba na e siguiente nivel
di crecemento, di desaroyo y di mas envolvimento den nos comunidad.
E directiva di Fundacion Museo Arubano tin un tarea di supervision (toezichthoudende taak) y ta facilita e rol di e
director y ta yud’e den su tareanan diario en general, tanto den e parti di guia como pa busca fondo, y mucho mas.
Anky Vrolijk a traha e ultimo 2 lunanan caba cu Fundacion Museo Arubano y a trece cun’e hopi experiencia den e
ramo di organisacion. Fundacion Museo Arubano ta contento cu a logra recluta Vrolijk, kende tabata responsabel pa
entre otro e institucion di MFA Noord, pa encabesa e organisacion.
E structura di Fundacion Museo Arubano ta data for di aña 1992, pero na 2015 a conoce cambionan structural cu ta
haci posibel pa pone 5 museo hunto bao di un organisacion. Ta trata aki di e Museo Historico (Fort Zoutman,
Oranjestad), Museo Arkeologico (Ecury Complex, Oranjestad), Museo di Comunidad (Nicolas Store, San Nicolas),
Museo Industrial (Watertoren, San Nicolas) y Museo di Carnaval (San Nicolas). Museo di Comunidad y Museo
Industrial ta programa pa habri na aña 2016 y Museo di Carnaval lo habri na 2017.
E idea general ta pa trece museonan mas cerca di comunidad y ta trahando pa reenforsa tur museo pa hisa e calidad
y logra pa nan yega na e nivel di Museo Arkeologico, cual ta reconoci como un di e miho museonan di Caribe. E
siguiente museo pa habri, den e prome mita di aña 2016, ta Museo Industrial. Ta trahando caba riba plannan pa haci
e museonan mas atractivo pa comunidad y subraya e importancia di historia y cultura.
Anky Vrolijk a gradua como trahado social na Hulanda y a traha pa algun aña den e ramo di gehandicaptenzorg na
Hulanda. Ora el a bolbe Aruba, Vrolijk a traha na Departamento di Asuntonan Social y na Centro Ortopedagogico.
Despues di algun aña trahando den e ramonan social y educacional, na april 2012 el a asumi e funcion di director di
YMCA. Desde aña 2013 pa 2015, Anky Vrolijk tabata encarga cu e Multifunctionele Accomodaties (MFA) como
director. E apertura di MFA Noord tabata un di su proyectonan principal.

http://www.diario.aw/2016/02/anky-vrolijk-awor-ta-encabesa-fundacion-museo-arubano/