Page 20 - MIN ECEM_Neat

December lo dicidi kico haci ora hedge

contract di WEB termina

Posted on 06/12/2017 9:50 am AST | Updated on 06/12/2017 9:53 am AST

ORANJESTAD – E contracto di hedging di WEB ta termina fin di e aña aki esta
december 2017. Asina director di WEB Aruba NV Luis Oduber a confirma pa
NoticiaCla. Esey ta duna e compania e posibilidad pa actua diferente cu e asunto di
tarifa di awa. E contract di hedging (cera un contract pa cierto termino riba un
tarifa fiho como garantia pa evita cierto risico) a impedi e compania di actua ora cu
e prijs ta mas barata cu e hedging agreement, cu ta algo cu nan tin cu biba cune
awor. “E efecto ta cu e fuel cu nos mester paga despues, lo ta basa riba prijs di
mercado actual y no e prijs stipula”, Oduber a bisa. Aworaki si e prijs riba mercado
ta mas abou cu e prijs cu a ‘hedge’, toch tin cu paga e prijs acorda anteriormente.
Un critica severo cu e compania mester a wanta for di algun aña pasa caba.

FAYO CU HEDGING

Ora cu e compania a dicidi pa mara e prijs na un suma fiho via e hedging contract di
100% na 2012, cos tabata mustra malo riba mercado internacional y kier a sigura un tarifa
standard como seguridad. Pa malasuerte di WEB, prijs a baha drasticamente, cu a pone
cu e efecto tabata adverso. WEB a soporta critica fuerte pa e decision cu e momento di
tume, tabata mustra uno bon. Algo cu nan mester a y ta biba cune ainda. “Nos mester siña
di e lesnan pa wak pa nan no ripiti” Oduber a bisa. E no ta yame un fout haci si, sino un
falta di comunicacion. No tabatin un plan aproba pa tur hende.

ORA CU HEDGING CABA

Ora cu hedging caba na december di e aña aki, tin cu wak kico ta bay haci pa januari. No
sa ainda kico e prijs di fuel oil lo ta pa e tempo ey segun Oduber. “Nos ta bay wak kico ta
bay haci pa garantiza e cliente cu e no ta bay paga mas hopi” Oduber a sigui bisa. Ta
posibel segun e director, cu otro aña lo por bay paga menos pa awa y coriente a
consecuencia di situacion. “Esey ta posibel” Oduber a sigui bisa. No ta asina si cu
automaticamente, sin hedging, cu e prijs lo ta mas barata otro aña. “Si nos no haci nada,
nos ta keda na merced di e mercado. Actualmente enberdad e prijsnan ta abou, e ta
cumbini nos. Pero ken ta bay garantiza nos e futuro” Oduber a bisa. Esey ta e reto mas
grandi cu nan tin aworaki. Prome cu ta asina leu, lo palabra cu e.o gobierno y Parlamento.
E decision lo ta sigur prome cu fin di aña.