Page 4 - Bon Dia, Solo Di Pueblo

A4

LOCALDiaranson 26 Augustus

CAFT a bin pa keda:

Despues di 2018 supervision di
Reino ta keda!

Mañan pa tur partido politico, representa den Parlamento of no, ta un dia importante.
Esey pasobra ta bay trata den Parlamento un proyecto di ley, cu tabatin un trayectorio
unico. E ley aki a nace den e negociacion cu gobierno di Hulanda (di Reino tambe),
unda di antemano e poder ehecutivo – gobierno – a acorda cu Hulanda cu lo ‘laga
Parlamento aproba’ e ley aki. Y Hulanda a pone den e acuerdo (Protocol) cu si
Parlamento mester tribi di cambia algo substancial den e ley y den e presupuestonan
cu lo sigui, anto lo bin un Maatregel van Rijksbestuur di tur manera pa coregi esaki.
Esaki deliberadamente a bay den e ley mes tambe: si Parlamento no ta cana straight
den e asunto aki, anto gobierno lo sa di tuma e medidanan corespondiente. Por ta cu
gobierno a consulta cu su base den parlamento prome cu nan a bay di acuerdo cu e
ultimatum Hulandes aki, pasobra esey e tabata. Por ta tambe cu nan no a haci’e y a
informa e coleganan den Parlamento despues di bay di acuerdo cu e ultimatum aki.
Di tur manera esey no ta haci tanto diferencia, ya cu den nos sistema den teoria e
organo legislativo (Parlamento) ta manda riba e organo ehecutivo (gobierno). Den
practica e pesonan pisa di partido tur ta ministro, anto e ‘backbenchers’ ta sinta den
Parlamento y mester haci loke nan “doñonan” bisa nan pa haci.
Tumando esaki den consideracion, no mester tin tanto imaginacion pa sa kico lo sucede
mañan den Staten: lo tin un mayoria den Parlamento pa apoya e acuerdo aki cu a bin
dilanti como ‘face saver’ pa gobierno Eman. Pro forma lo laga oposicion trece dilanti
nan disgusto cu e ley aki y su intervencion pa loke ta Aruba su finanza publico. Pero
na final di dia e resultado ta conoci caba.
Supervision despues di 2018
Un punto importante riba cual Prome Ministro Eman ta trata di presenta e realidad
otro cu e ta, ta unda e ta pretende cu e protocol cu Hulanda ta encera un acuerdo
pa yega na un presupuesto balansa na 2018, pa despues Aruba institui su propio
‘Begrotingskamer’ y anto gobierno ta sigui ‘toca y baila’ e mes, sin Hulanda... Esey
absolutamente no ta asina.
Den e protocol bao di punto 12 ta poni bon cla y nos ta cita: “Het College stuurt aan de
raad van ministers van het Koninkrijk zijn conclusies indien het Balanced Budget als
bedoeld in de meerjarencijfers uit de landsverordening tot wijziging van de begroting
2014 duurzaam is gerealiseerd in overeenstemming met de bepalingen uit onderhavig
protocol en landsverordening, met het oog op instelling door Aruba in samenwerking
met Nederland van een Begrotingskamer om het onathankelijk toezicht over te nemen
en voort te zetten. Op dat moment wordt een begrotingspad vastgesteld naar houdbare
overheidsfinanciën met een staatsschulsquote van op termijn 40%”
Esaki kiermen claramente cu lo bin un supervision independiente pa percura 1) pa
logra un balanced budget pa 2018, y 2) pa institui un Begrotingskamer pa tuma over
y continua e supervision independiente, den tur caso te ora cu Aruba ta bek na un
situacion di debe di 40% compara cu GDP. Y esey ta ki tempo, no na 2018, pero na
2025? 2030?
Esaki ta prueba evidente di loke Eman mes a acorda cu Hulanda, na Hulanda na
december 2014: supervision independiente di manera structural hinca den ley di
Aruba.
E supervision independiente no kiermen e tipo di organismo cu ta depende
completamente di gobierno di Aruba, cu nan por manda cera …. ora nan ta haya ta
bon. Kiermen Reino ta haya algo structural di bisa den e Begrotingskamer, aunke
kico Prome Ministro bisa, pasobra ta esey el a firma pe. Pa e motibo aki, CFT of
CAFT ‘is here to stay’.
Esey ta e realidad cu nos mester siña biba cun’e, cu nos ta aplaudi of rechasa, esey ta
keda aproba mañan.