Page 19 - DIGICEL

Desde 2004 Aruba a conoce un di tres proveedor di servicio di celular y comunicacion di data (internet),
esta DTH Television & Telecommunications N.V. cu a opera bou di e nomber comercial MIO.
E ta bisa cu dor cu e ta chikito, cu poco cliente, cu e no por cumpli cu e cobransanan halto di Gobierno.
Cada 10 aña mester paga 7.2 miyon florin pa e concesion y 1.5 miyon pa aña pa e frecuencianan cu ta uza
via antena. Pa awor, e compania ATN, un compania Mericano cu a cumpra eDTH over na 2010, tin un
debe cu Gobierno di mas o menos 15 miyon florin!

E compania a drenta a traves di e licencia cu DTH Television & Telecommunications N.V. a gana durante
un destaho publico na 2004 den cual por lo menos 3 compania a participa. E compania DTH Television
& Telecommunications N.V. e tempo ey tabata pertenece na Curacao Telecom cu despues a wordo
cumpra dor di Digicel. Como cu Digicel tin un licencia na Aruba caba, ley no ta permiti'e tin dos, pues
obligatoriamente e mester a bende e licencia.

Asina Gilbert Armenta a cumpra e licencia uzando e compania financiado Carthesian. Na Aruba Terence
Lacle, kende tambe tabatin accion den e compania for di tempo di Curacao Telecom, a keda na cabes di e
proyecto. Asina nan a lansa servicio di MIO cu ta brinda posibilidad pa surf riba internet uzando
tecnologia mobil, tanto na Aruba pero tambe den Antias. Esaki ta un producto masha gusta pasobra nan
ta e unico compania cu por ofrece e servicio aki riba tur tres isla ABC.

Pero e licencia duna na DTH Television & Telecommunications N.V. no tabata pa servicio di internet so,
sino tambe pa brinda servicio di comunicacion via celular. Pa esaki e compania a cera un acuerdo di “co-
sharing” cu e companianan di telefon existente pa uza nan cel-site pa nan antenanan. DTH Television &
Telecommunications N.V. a lansa un red di CDMA na Aruba, cu ta un plataforma diferente na esun di
GSM cu nos conoce riba nos isla. Specialmente turistanan di Merca ta uza CDMA. Parce cu pa luna e
producto aki ta percura pa 500 mil dollar di entrada, tur basa riba e servicio di “CDMA Roaming”.
Mester bisa cu separa di DTH Television & Telecommunications N.V., cu Setar y Digicel tambe ta ofrece
servicio di CDMA, aunke e ta un poco limita y no ta wordo propaganda mes pasobra e ta mas bien un
servicio di roaming pa turistanan.

E problema ta cu den e concesion di DTH Television & Telecommunications N.V. ta para cu e mester
percura pa un servicio di comunicacion celular cu cobertura tur rond di nos isla, loke nan no ta haciendo
awor. Tambe e concesion ta mara na un suma cu mester paga anualmente, por cierto ta recibonan cu e
compania DTH Television & Telecommunications N.V. tin tres aña sigui sin paga, sumando na un total
di 6.7 miyon florin. Na aña 2010, ora cu ATN a cumpra DTH over, nan a cancela mayoria di e debenan
atrasa, pero desde cu nan ta aden tampoco a cumpli cabalmente cu e cobransanan di Gobierno y sigur no
tampoco cu e cobransa di licencia cu nan a haya na 2014 di un otro 7.2 miyon florin.

Mester bisa cu Gobierno a laga mucho tempo pasa tambe pa a cobra e recibo aki, sino lo a cera MIO for
di aña 2014 caba ora cu nan a demostra di no tin forsa pa cumpli cu e cobransa pa licencia, cu Setar y
Digicel si ta paga cada pasa 10 aña.

Cu e decision tuma pa Minister mr. drs. Richard Arends diabierna ultimo pa cera tur cell-site y stop
operacion di MIO na Aruba, ta haci masha dificil pa por mantene 3 compania di telecomunicacion riba
nos isla. Esun cu kier cumpra MIO awor mester cuminsa na paga e debe di 15 miyon florin cu Gobierno,
locual ta haci su “business-case” hopi zwak.