Page 9 - AWEMAINTA

Dialuna, 10 Februari 2020 AWEMainta 9

Situacion no higienico den

edificio na Frankrijkstraat

a haci cu Departamento di

Recherche mester a Sali

Departamento di Recherche ta bay haya su edificio
nobo y limpi na Wayaca. Fin di aña pasa KPA a haya
e edificio na Wayaca pa cuminsa traha riba dje y no
ta manera ta ser bisa cu ta pa hopi luna KPA tin e
edificio den su poder y ta mal gasta placa.
Hefe di Polis sr. Andrew Hoo ta bisa cu tin un
tiki retraso den e trabou debi cu e comparticion di
edificio tabata pa uzo pa personal di oficina y no pa
uzo policial.

Pa tin seguridad den edificio mester a haci cambio pa
coleganan Polis brinda bon servicio y e ciudadano
haya un mihor servicio y tur e cambionan aki
ta tuma tempo. E edificio na Frankrijkstraat cu
Departamento di Recherche tabata aden no tabata
bon pa nan salud.
E edificio pa hopi aña tabatin mold y molester di
awa di pos cu tabata drenta den e edificio. Tur e
molesternan ey a pone cu no tabata un situacion
saludabel pa hende sigui traha ey nan.
Mester a saca e Departamento di Recherche for di
e edificio pa bienestar di nan salud y tur esey a bin
cu poco inconveniencia p’e Recherchenan mes pa
duna servicio na pueblo.

Pa Hefe di Polis sr. Hoo, salud di un colega ta bay
prome, y no ta bay acepta cu Recherche of Polis
ta bira malo pa despues no por brinda servicio.
Despues cu e Recherchenan a sali di Frankrijkstraat
pa bienestar di nan salud, algun di nan a bay Noord
y Oranjestad unda nan ta traha cu cierto cita adapta
na e orarionan di warda.
Ta ser bisa cu tin Recherche na cas, sr. Hoo a bisa cu
esaki no ta cuadra cu berdad. Pa loke ta finalisacion
di e trabounan na edificio na Wayaca sr. Hoo ta spera
cu esaki lo ta pronto.

E no kier mara su mes na tempo, pasobra e no
tin e martiu den su man pa haci e cambionan cu
e kier wak, pero esey ta den man di e contratista
y otro compania cu ta aporta na drechamento y e
cambionan cu mester bin den e edificio.
E producto final mester ta di calidad y no keda cu
algo mitar caba y despues mester keda yama hende
pa bin haci mas ahustacion of cambio cu lo costa
mas placa.

Hefe di Polis Hoo, a pidi un poco mas pasenshi
pa despues bisa cu awor tin algo di calidad pa
Departamento Recherche y Polis traha.