Page 16 - MIN JUS 21 JULY 2015

30 AWEMainta Diamars, 21 Juli 2015

Minister Dowers
a participa den
siere di proyecto

“Jij bepaalt wie je

bent” di Hulanda

MINISTER di Husticia, mr. drs. Arthur Dowers kende

ta riba un bishita di trabou na Hulanda a ricibi invitacion
pa mira con e proyecto “Jij bepaalt wie je bent” ta
funcionando. E ta un proyecto similar n’esun di Aruba cu
ta hiba e nomber “Bo futuro ta den no man”.
E ta un proyecto cu a wordo introduci na Aruba aña
pasa den cooperacion cu Hulanda y awor e ta den fase
di evaluacion, pa mira si e proyecto lo mira continuidad.

E ta un proyecto unda ta crea un fondo special pa permiti
e muchanan participa den diferente tipo di deporte,
contribuyendo cu e materialnan necesario.
Aki na Aruba a logra hinca e muchanan den softbol y
futbol. Alabes ta duna un suma n’e coach cu ta guia e grupo
di hobennan aki. E proyecto ta dirigi riba prevencion serca
hobennan, pa nan no cay den vandalismo of delitonan mas
serio. E tin como efecto duna e hobennan cierto habilidad
social y recreacion sano, y na mesun momento ta duna
nan guia extra pa haya mihor resultadonan na scol.

“Pa loke t’esaki, mi tin cu bisa cu di loke mi a mira, serca
e hobennan cu a drenta e proyecto aki nan resultadonan
a mehora riba tur tereno, tanto na scol como den
comportacion y nan prestacionnan deportivo, ya cu
nan a wordo permiti pa demostra e talento cu nan tin,”
Minister Dowers a duna di conoce. P’e coachnan por
guia e hobennan aki, nan tambe mester a haya e training
necesario, ya cu e idea no ta solamente pa participa, pero
mester coach e aspectonan social, manera comportacion
y normanan cu mester wordo hiba den un comunidad.

Na Hulanda, el a sigui splica, tabatin siere di e programa
di e aña aki unda tabata presente diferente deportista,
su colega Minister di Husticia di Corsou, Nelson Navarro
y Alcalde di Rotterdam, Ahmed Aboutaleb. Minister di
Husticia di Hulanda mes no por tabata presente, ya cu e
tabatin otro evento pa atende. Tabata interesante, segun
e mandatario, presencia di deportistanan manera Patrick
Kluivert, kende ta coach na Corsou, y e hungador di Ajax,
Ricardo van Rhijn cu ta Embahador di e proyecto.

“E hecho cu tin mas deportista nacional cu ta contribui den
e proyecto aki ta demostra cu nan ta kere den e programa
pa duna hobennan chens pa participa den actividadnan
deportivo y keda leu di problema,” Dowers a splica.
Minister y diferente di e muchanan cu a participa den e
proyecto na Hulanda, a presencia un wega di baseball
entre Corsou y Hulanda.