Page 49 - MIN JUS 21 JULY 2015

Ministro Dowers a participa den cierre di proyecto “Jij bepaalt wie je bent” di
Hulanda
Publication: Tuesday, 21 July 2015. Categoria: General

ORANJESTAD (AAN): Informe di Hulanda ta indica cu Minister di Husticia Arthur Dowers cu
ta riba un bishita di trabao na Tera Frieu, a ricibi invitacion pa mira con e proyecto “Jij bepaalt
wie je bent” ta funcionando. E ta un proyecto similar na esun di Aruba cu ta hiba e nomber “Bo
futuro ta den no man”.
E ta un proyecto cu a worde introduci na Aruba aña pasa den cooperacion cu Hulanda y awor e
ta den fase di evaluacion, pa mira si e proyecto lo mira continuidad.

E ta un proyecto unda ta crea un fondo special pa permiti e muchanan participa den diferente
tipo di deporte, contribuyendo cu e materialnan necesario. Aki na Aruba a logra hinca e
muchanan den softbol y futbol. Alavez ta duna un suma na e coach cu ta guia e grupo di
hobennan aki.

E proyecto ta dirigi riba prevencion cerca hobennan, pa nan no cay den vandalismo of
delitonan mas serio. E tin como efecto duna e hobennan cierto habilidadnan social y recreaccion
sano, y na mesun momento ta duna nan guia extra pa haya miho resultadonan na school. “Pa loke
ta esaki, mi tin cu bisa cu di loke mi a mira, cerca e hobennan cu a drenta e proyecto aki nan
resultadonan a mehora riba tur tereno, tanto na school como den comportacion y nan
prestacionnan deportivo, ya cu nan a worde permiti pa demostra e talento cu nan tin,” Minister
Dowers a duna di conoce. Pa e coachnan por guia e hobennan aki, nan tambe mester a haya e
training necesario, ya cu e idea no ta solamente pa participa pero mester coach e aspectonan
social, manera comportacion y normanan cu mester worde hiba den un comunidad.