Page 31 - MIN JUS_Neat

Minister Arthur Dowers: Tur dia tin polis ta controla e area
di Dump na Tamarijn

Friday, 30 June 2017 19:35
Comparti

E dump na Tamarijn pa varios dia caba ta den foco despues di e ultimo candela cu tabata tin cu a haci cu scolnan den
vecindairo mester a cera pa motibo di e huma y e holo malo cu esaki a saca. Ciudadanonan ta hopi rabia pasobra
awo, un biaha mas, huma a bay laira y nan kier husticia. Nan kier pa persigui doño di e tereno.

Nos a combersa cu Minister di Husticia, Arthur Dowers tabata tin cierto combersacionnan. El a splica cu tabata tin
un situacion cu a cende candela na e dump aki y esaki a trece un daño hopi grandi pa e comunidad den vecindario. A
papia cu esnan cu ta biba den e bario y a tuma medida mesora. Por a mira kico a pasa eynan y a prohibi e
personanan cu tabata haci uzo di e facilidad aki pa nan tira sushi eynan. Esey a tuma luga, como kiera cu pa uza un
luga como dump, mester di hindervergunning di e minister y e personanan aki no tabata tin esaki. A duna di biaha e
instruccion pa no tira sushi mas eynan.

Banda di esey a pidi Cuerpo Policial pa vigila esaki, cual nan ta haci tur dia. Cuerpo Policial ta analisa e situacion pa
wak si tin cualkier cos ta tuma luga eynan, cu no mag tuma luga. Tambe ta asina cu a saca potret for di laira, pa
confirma tambe con e situacion ta na e momento ey y si tin cualkier cambio, lo actua contra esaki.

A tene un conferencia di prensa recientemente, caminda cu e habitantenan a expresa nan situacion y e minister tin
comprension pa esaki. Por a mira si cu tin varios persona den prensa cu a saca esaki for di contexto y kier bin cu un
pretencion cu minister di husticia no lo a haci nada den esaki.

Minister di Husticia ta esun cu ta duna hindervergunning. Por duna instruccion na momento cu esaki no cumpli pa
para, pero e no ta responsabel pa yena e tereno ni pa haci ningun otro facilidad cu ta rekeri medio ambiente, etc. E
minister a trece padilanti cu e ta custuma cu tur loke pasa pais Aruba, cu principalmente e miembronan di prensa
lega na partido MEP y tambe liga na otro partidonan den oposicion, ta pone e responsabilidad den scochi di minister
di husticia, mester ta hopi cla cu esaki. Minister a haci su parti, a actua y na e momento aki tin un grupo di persona
cu ta reuni, cu ta analisando e situacion pa wak ki ta e pasonan cu lo bay tuma pa soluciona e problema aki a largo
plazo. Cu huma por a sali for di e area aki, a purba di tuma contacto cu esnan cu ta biba den vecindario y no a haya
nan. Tambe otro intento a wordo haci, toch tin cu bisa a pidi brandweer pa bay analisa e situacion. Brandweer a
informa tambe, cu na momento cu nan a yega, nan no a constata ningun candela na e area. Loke si nan a mira, ta un
bulldozer ta hala santo. Esey ta bin door cu e candela cu tabata tin simannan atras eynan, te na e momento aki, no a
paga. Brandweer no por a page tampoco. Loke nan por a haci ta duna instruccion na e doño di e tereno pa tapa esaki
cu santo. Tin di compronde cu esey a tuma luga y awor aki mester sigui e analisis pa wak con lo sigui tapa esaki, pa
asina eynan garantisa cu dado momento e candela aki lo paga. Pero nada cu husticia ta bay over di dje, a tuma luga
mas despues cu a drenta den accion y a actua contra esnan cu a tuma e pasonan aki. Cu tin diferente procedura ta
andando ta asina. Tin diferente otro cos cu mester tuma luga pa loke ta trata e solucion di e problema aki a largo
plazo y e asuntonan di medio ambiente, tambe ta compronde. Esey na momento cu constata cu tin infraccionnan
contra medio ambiente, e ora ey lo pidi autoridad hudicial pa por tambe actua, pero esey no ta na ordo awor aki.
Loke ta na ordo e momento aki cu ainda e personanan aki tin molester di esaki, pero e pasonan cu husticia a tuma a
wordo tuma pa para e situacion y preveni cu loke ta tumando luga na e luga aki, en pugna cu nos leynan, cu esey a
para, segun minister Dowers.