Page 41 - MIN JUS 31 OCT 2015

Djasabra 31 òktober 2015 43

KORTE TA OBLIGA ERWIN EUSTACIA PA REKTIFIKA
WILLEMSTAD. - Korte ta obligá Erwin Eustacia pa rektifiká e loke ku el a
ekspresá di Ritzel Godfried.
Hues a formulá e teksto ku
lo mester keda publiká den e
medianan kaminda ku esaki
a keda publiká.

Manera ta konosí ku
Ritzel Godfried ta traha komo
manager di Curaçao Tourist
Board i Erwin Eustacia
ta miembro di Hunta di
Komisario di Curaçao Tourism
Development Foundation.

Dia 29 di yüli di e aña aki,
Eustacia a manda un mail pa
dos funshonario di Partido
Nashonal di Pueblo (PNP),
esta sr. Reinilia i Davelaar.
Den e nota aki Eustacia ta
hasi pregunta riba tíketnan
ku Godfried lo mester a hasi
uso di dje di e kompania di
aviashon Air Berlin i banda
di esei, el a menshoná
vários punto mas di karakter
difamatorio den direkshon
di Godfried. Di un manera òf
otro e mail aki a bira konosí
i a yega diferente media ku a
publiká esaki.

Den un karta fechá 24 di
ougùstùs Godfried ta pidi
rektifikashon, pa motibu ku

e loke ku a keda ekspresá
di su persona no ta kuadra
ku bèrdat. Godfried ta pidi
rektifikashon den tur media
kontra di un multa basta pisá.
Na komienso di e tratamentu
di e kaso, Eustacia a ekspresá
su mes ku e ta di akuerdo
pa e rektifiká. Esaki a pone
ku e kaso a kaba hopi lihé
kaminda ku hues a formulá e
teksto di rektifikashon i pone
tambe ku Eustacia mester
paga gastunan di e proseso
di korte.