Page 27 - AHATA
P. 27
ORANJESTAD (AAN): Segun sra Arends-Reyes por a tuma nota cu Minister di Turismo
ta orguyoso di su maneho pa a logra volumen mas grandi di pasahero di crucero.
Ta bon pa remarca cu desde 2017 caba tabata pronostica cu e añanan 2018, 2019 y
2020 lo ta aña nan stabil cu acuerdonan sera añanan anterior caba pa Aruba lo por
ricibi entre 750 mil pa 800 mil pasahero di crucero.
Tin varios motibo cu Aruba por yega na e cantidad aki y ta danki na trabaonan y
inversionnan grandi algun aña anterior den awanan di Aruba a pasa manera ‘dredging’
pa hasi e awa mas hundo pa awe Aruba por ricibi barconan mas grandi cu tin capacidad
hopi mas grandi di pasahero.
Por ehempel den e liña di Royal Caribbean Cruise ta ricibiendo barconan manera
Freedom of the seas enbes di Adventure of the seas y pa Carnival lines ta hañando
Carnival Horizon y Carnival Freedom. Tambe a percura añanan anterior pa den e ‘low
season’ tin mas barco y barconan nobo manera a logra trece e barco di Disney Cruise.
Tur esaki ta contribui na yega na volumen mas grandi di pasahero pero esey no ta kita
cu mester pone hopi atencion pa e pasaheronan aki y nan contribucion yega pa ‘trickle
down’ pa e economia di centro di ciudad tambe.
Awor mas cu nunca mester bon relacion cu APA, e centro comercial y representantenan
di centro di ciudad y e conciergenan di hotelnan. Ta pasando demasiado biaha cu e
tiendanan ta habri y e turistanan di barco no sa.
Mester percura pa e turistanan aki keda yega den nos centro di ciudad tambe. E magno
proyecto di Port City si no ehecut’e bon por bira un ‘net’ caminda lo gara e turistanan y
tene nan na e localidad aki so y asina competi unfair cu centro di ciudad y e area
hotelero. Mester tin di berdad un bon planificacion y maneho pa Port City no bay mata
tur otro negoshi den e cercania.
Aruba su turismo y crecemento riba crecemento ta bon pero mester ta balansa e
mester keda uno placentero pa Aruba y su ciudadanonan. Nos naturalesa incluyendo
nos beachnan ta pa nos tur gosa di dj’e.
