Page 5 - DIGICEL
P. 5
Di e lista di 10 candidato, a resalta postulacion di Wanda Broeksema, kende ta bon
conoci como e director di Digicel Aruba. Wanda Broeksema a cuminsa su carera den
mercadeo y promocion na Brouwerij Nacional Balashi, a sigui pa Digicel Aruba como
Marketing Manager, a crece den su carera y a bira Customer Relations Manager di NV
Elmar, pa despues subi como CEO di Digicel Aruba. E ta dispuesto awor pa dedica poco
di su conocemento y experencia na desaroyo di sector comercial di nos isla.
Lindy Croes di 28 aña di edad a studia “Business and Information Systems Management”
na Merca. Na su regresa el a cuminsa maneha Gianni’s Nutrition Center, cu ta compania
di su tata y na januari e aña aki a habri su propio negoshi di paña, Lindy Lifestyle
Boutique.
El a bira popular pa su envolvimento, su empuje y su insistencia pa organisa eventonan
den caya grandi. E forma diferente di mercadea a sa di atrae hopi bishitante den Caya
Betico Croes riba dianan specifico di benta. El a proba tur demas comerciante di Caya
Grandi, cu si ta organisa, cu e ta duna bon resultado den forma di mas benta.
Pa ambos sector tin 5 candidato, pero ta tres miembro so mester, pues 7 candidato lo no
logra drenta. Pesey ta importante e voto di comerciantenan inscribi na Camara di
Comercio. Tambe ta resalta e hecho cu poco poco tin mas interes di sanger hoben den
comercio, pa ocupa un puesto den directiva di e organisacion. Esey riba su mes ta mustra
un tendencia di rehubenece Camara di Comercio, no solamente e directiva, pero tambe e
leynan y e servicionan cu ta ofrece eynan.
