Page 44 - ATA

Riba 28 di februari ultimo Camara di Comercio y Industria di Aruba (KvK) a tene un

reunion cu San Nicolas Business Association (SNBA). E reunion aki tabata pa mira con

desaroyonan a sigui despues di un reunion den pasado y pa hunto discuti riba

desaroyonan cu a tuma luga na San Nicolas den e ultimo tempo.

E reunion tabata uno fructifero y a bay den bon ambiente. Den cuadro di sostene

empresario local KvK a tuma e iniciativa pa invita SNBA pa tene e reunion aki na

O’Neills Kitchen situa na San Nicolas. Intencion di KvK ta pa duna sosten na diferente

sector y empresario por medio di dialogo y a base di tene reunion den un atmosfera

empresarial.

A papia estrechamente di e rol di KvK y con hunto SNBA lo por traha na mehora loke ta

brinda na e pueblo di San Nicolas. SNBA a trece dilanti e importancia pa trece

negoshinan cu lo contribui na mehoracion di un economia sano. Un punto cu a resalta for

di agenda ta e necesidad pa crea un economia diversifica. A pone enfasis riba e

importancia pa crea fluho via diversificacion pa asina por crea mas trabao na San Nicolas

cu lo eleva produccion local.

Un otro punto cu ta di sumo importancia ta e integracion di un servicio di ferry cu lo yega

na haf na San Nicolas. Un ferry lo stimula import y export den e area aki y hunto cu esaki

lo crea mas incentivonan comercial via San Nicolas pa Aruba.

Tumando na cuenta e situacion di Citgo y tambe nan recien anuncio di ‘slow down’ e

operacionnan na e sitio, e ta bira ainda mas importante pa considera otro posibilidadnan

pa crea pilarnan economico nobo. E ta hopi crucial cu incentivonan atractivo wordo crea

pa di e forma aki haci posibel e creacion di un plan comercial amplio pa San Nicolas.