Page 27 - MIN ON

Proyecto Escolar Nos Herencia organisa pa SMFA y Muchila
Creativo

Thursday, 17 March 2016 10:57

Comparti

Stichting Monumentenfonds Aruba (SMFA) e ultimo aña nan a bin ta pone mas atencion na locual ta
conscientisacion y educacion tocante nos monumentonan.
Aña pasa nos a cuminsa cu presentacionnan na scolnan y a resalta cu hopi of casi niun di e alumnonan no
sa kico ta un monumento y no a ni sikiera nunca tende e palabra.
Asina nos a yega na e idea pa hasi un proyecto dedica specialmente na nos monumentonan y a aserca
Muchila Creativo pa ta un partner cu nos den esaki. Mirando cu e aña aki SMFA ta celebra 20 aña di
existencia esaki ta e momento ideal pa den cuadro di e celebracion aki siña nos muchanan mas di nos
monumentonan.
Hunto cu Muchila creativo nos a crea e proyecto escolar ‘ NOS HERENCIA’ . E proyecto ta pa clasnan 4 y
5 di scolnan basico. E ta parti den dos fase : e prome ta caminda cu nos ta duna informacion na e
alumnonan tocante monumento; kico ta un monumento , dicon nan ta importante, siñanan e storianan
tras di nos monumentonan. E prome fase a cuminsa caba caminda te ainda aproximadamente 800
alumno di e scolnan participante awor sa kico ta un monumento. Y e di dos fase ta caminda cu cada scol lo
haña un monumento cu nan lo tin cu busca informacion di dje y trese e informacion aki bek den forma di
un presentacion y material di exposicion. Lo tin un jurado cu lo evalua tanto e material di exposicion
como e presentacion y scohe un scol ganador. E presentacion y exposicion lo tuma lugar den September
cual ta luna di monumento.
E proyecto aki no solamente ta siña e alumno tocante nos monumentonan pero tambe con tin cu busca
informacion den entre otro nos archivonan y tambe nan tin cu traha hunto den team pa por yega na e
resultado final.
Ya den un corto tempo nos por mira resultadonan positivo di e proyecto aki. Awe cu e scolnan ta
celebrando nos himno y bandera hopi di nan a duna atencion tambe den nan celebracion na nos
monumentonan como parti importante di nos herencia cultural.
SMFA y Muchila Creativo ta hopi contento di por conta pa e proyecto aki cu e confiansa di Aruba Bank
cual ta nos patrocinador oficial y cu a pone disponibel un suma di diez mil florin cu lo keda reparti entre e
premionan.
E scol ganador di e prome lugar lo ricibi 5 mil florin di dos lugar, 2500 florin y di tres lugar 1000 florin. Y
tambe lo tin otro premionan manera entre otro e scol mas original, cu mas apoyo.
SMFA y Muchila creativo ta invita e pueblo di Aruba pa keda pendiente ora september ta yegando nos lo
informa cual lo bira fecha ,lugar y ora di e presentacion final pa asina tur hende por aprecia e creacion di
cada un di e scolnan participante.