Page 71 - AHATA

ORANJESTAD (AAN )– Reino Hulandes tin atencion total y preocupacion serio pa e
situacion na Sint Maarten, cu ta den gara di disturbionan cu ta tuma luga na e parti
Frances di e isla.

Manera ta conoci poblacion di Saint Martin a lanta den disturbionan dirigi contra
gobierno na Francia, bou cual e parti Frances di e isla ta resorta.

Mientras e Prome Ministro Interino di Sint Maarten a bisa cu te awor no tin motibo pa

preocupacion y cu e no ta mira peliger grandi pa e problemanan pasa pa Sint Maarten
tambe, e hecho cu na un isla chikito tin disturbio ta keda motibo di preocupacion pa
Reino Hulandes.

Informacion ricibi ta indica cu autoridad di Sint Maarten a deshaci di baricadanan cu a
wordo lanta na frontera di e dos paisnan.

E Ministro Presidente Interino di Sint Maarten a mustra cu e no ta permiti barconan cu

carga destina pa Saint Martin haci uzo di facilidadnan pa mara y baha ekipo ni producto
na Sint Maarten.

Pa DIARIO ta importante e interesnan Arubano na Sint Maarten. Mundo empresarial di

paisnan Hulandes tin lasonan directo cu Sint Maarten cu tabata conta semper cu
filialnan di negoshinan estableci na Aruba.

Na e momentonan aki no tin preocupacion cu e interesnan directo of combina di Aruba

na Sint Maarten lo wordo afecta pa loke ta pasa na Saint Martin.

E situacion na e isla, di cual e parti Hulandes a bira un pais autonomo na 2010, ta tene
sigur famia di habitantenan di Sint Maarten den suspenso.

E lasonan personal entre Aruba y Sint Maarten ta conoci y Aruba ta biba e momentonan
actual cu e pais.

E defensa di Sint Maarten ta resorta bou di Reino Hulandes mescos cu Aruba.
Informantenan ta indica cu si ta wordo indica necesario semper e isla por pidi asistencia
di Reino pa sostene e trabou di Polis na Sint Maarten cu ta trata di no ocasiona un
situacion mas serio cu e poblacion di Saint Martin.