Page 32 - ARUBA BANK 9 MAART 2016

AWEMainta Diaranson, 09 Maart 2016 3

Banco BBA lo a
sera su porta
siman pasa

APARENTEMENTE e banco conoci aki na Aruba como

BBA, a dicidi di sera su portanan y cu siman pasa lo a informa
Banco Central di esaki. Un desaroyo sorprendente, pero
na mes momento tambe logico mirando publicacionnan
continuo di prensa Venezolano, relaciona cu envolvimento
di algun empresario Venezolano cu ta wordo investiga pa
algun tempo caba cu investigacion relaciona cu labamento
di placa y otro puntonan.

For di algun aña caba e nomber di Castillo Bozo di e banco
Venezolano Banvalor, ta ser relaciona cu BBA aki na Aruba
caminda publicacionnan ta mustra cu Bozo lo a dirigi capital
for di Banvalor p’esun di BBA na Aruba. Manera ta conoci aki
na Aruba BBA ta conoci como banco di e tata di e actual lider
di MEP, Evelyn Wever Croes y publicacionnan ta mustra cu
hasta funcionarionan halto di Banvalor, lo a duna testimonio
di capital di placa cu a ser manda pa BBA den pasado sin cu
el a pasa via canalnan normal di control tanto n’e pais Sur
Americano, como n’e isla di Aruba.

Prensa Venezolano ya caba a sugeri na varios ocasion
cu autoridadnan di Aruba mester haci un investigacion
relaciona cu envolvimento di entre otro Castillo Bozo den e
banco aki na Aruba y hasta a mustra cu Interpol lo e pone e
empresario Venezolano aki riba su lista di figuranan busca pa
husticia. Rumornan insistente den fin di siman tabata mustra
cu doñonan di BBA aki na Aruba lo a tuma e decision di
cancela tur actividad di e banco aki cu e intencion di elimina
esaki por completo loke ta bolbe lanta duda grandi tras di e
motibo pa cu esaki.

Tin publicacionnan tambe riba e banco aki caminda ta
menciona cu e banco BBA a wordo funda cu sosten total di
e ex lider di MEP den calidad e tempo ey di Prome Minister
di pais Aruba, esta Nelson Orlando Oduber.
E actual lider di MEP ta sigui ser menciona di varios di asunto
den cual su tata ta envolvi, entre otro den e caso di Irus Crius
y despues p’e sosten cu el a ricibi for di e ex Prome Minister di
Corsou, Gerrit Schotte, kende e siman aki lo ricibi veredicto
di Corte relaciona cu caso di investigacion pa labamento di
placa y otro cargonan hopi serio.

Pues ta desaroyonan cu no ta mucho alentador p’e lider
di MEP, kende siman pasa a papia riba gobernante y
Parlamentarionan cu integridad, mientras cu su persona
ta circulando den un ambiente cu sigur no t’e ehempel mas
mihor pa integridad.
Den dianan benidero lo trata di averigua y confirma si di
berdad BBA a stop di existi y cu ya no ta brinda servicio mas
na ningun instancia.