Page 6 - MIN ECEM

ORANJESTAD, Aruba

Departamento di Asuntonan Economico lo cuminsa eherce control na waf

No solamente e fenomeno di importacion di gasolin ilegal di Venezuela tin pleno atencion di
Ministernan Arends y Bermudez, pero tambe e negoshi di benta di productonan sea di Colombia of

Venezuela cu pa medio di barconan ta drenta Aruba cu no ta cumpli cu e exigencianan di
establecimento di negoshi. “Tur esnan cu ta haci e negoshi aki na Aruba mester tin un permiso di

establecimento,” Minister Arends a bisa. El a indica cu nan ta hayando hopi keho di comerciantenan
local pa loke ta e negoshi di benta di productonan procedente di Venezuela of Colombia di biaha
despues di wordo importa. Durante un reunion cu Ministernan Bermudez y Arends a tene cu
Departamento di Asuntonan Economico, DTI, ASTEC, APA, Douane y Douane Recherche e asunto

aki a keda discuti y decision a keda tuma pa frena e situacion indeseabel aki.

Minister Arends: “E productonan ta wordo rebendi na supermercadonan di un manera ilegal. Esnan

cu ta bende e productonan aki no tin un ‘vestigingsvergunning’, nan no ta contribui na impuesto y
pesey mes cu Departamento di Asuntonan Economico ta bay ta fisicamente presente na waf pa ora e
transaccionnan aki tuma lugar pa pidi esnan envolvi e documentonan necesario pa por importa y
bende productonan aki na Aruba.” Arends a bisa cu hopi biaha e benta ta sosode na moda di bisa den

parkinglot mes. Pa por haci e negoshi aki mescos cu pa tur otro negoshi mester tin permiso.

“Ta pesey mes tambe cu Departamento di Asuntonan Economico ta bay tin un rol hopi mas visibel
den henter e proceso fisico di importacion di productonan riba nos isla.” Desde awor padilanti ta bay

frena e negoshi aki tambe. Asina ta cu tur hende ta avisa cu control rigido ta bay start riba e forma di
haci negoshi aki.