Page 65 - MIN ECEM

AVP: Marisol Lopez Tromp kier cambia ‘stempelparlement’
cu el a dirigi tres aña largo

Wednesday, 19 July 2017 20:53
1

Comparti

Durante di e campaña electoral cu ta tumando luga, a bira un custumber y hasta tradicion di scucha
politiconan nobato, politiconan cu poco experencia y politiconan madura y satura, papia locura cu ta laga
hende babuca.
Un di e declaracionnan aki a ser haci pa e ex Presidente di Parlamento, Marisol Lopez Tromp, kende a
mustra cu su partido nobo, POR, lo bay introduci cambionan pa evita cu Parlamento ta sigui como loke el
a yama un stempelparliament.

Esaki ta un di e locuranan cu mas ta laga hende babuca, ya cu Marisol no a drenta politica den ultimo
lunanan, pero tabata miembro prominente di partido MEP, a converti su mes den un di e votegetter di
mas grandi cu e partido geel a yega di conoce y a fungi como Minister den varios gobierno di MEP.
Ora cu el a bira miembro di partido AVP, Marisol a haya pa ocupa un di e funcionnan di mas halto cu tin
aki na Aruba, esta Presidente di Parlamento di Aruba cual funcion el a eherce pa mas cu tres aña largo.

Durante di e periodo aki, Marisol a pasa basta luna na cas cu kebrante di salud y tambe a percura pa un
di e confrontacionnan mas mahos den Parlamento di nos pais, ora cu el a trata di agredi un colega di su
fraccion den Parlamento.

Un incidente cu a sosode durante di e periodo cu e tabata malo na cas y no por a cumpli cu su trabou
como Presidente di Parlamento pero a bin eynan caminda e confrontacion a surgi.

Despues cu Marisol no a wordo reeligi como Presidente di Parlamento, el a bandona partido AVP y a bira
independiente mientras cu ya tur hende tabata sa cu e lo uni su mes na partido POR despues cu el a reuni
na Corsou cu e lider di e partido aki.

Awor diripiente Marisol ta papia di cambio pa evita cu Aruba su parlamento ta actua manera un tipo di
stempelparliament, mientras cu e tabata den funcion pa haci tur cambio cu e por a haci pero awor pa
trata di gana interes di votadonan, e ta hunga e rol di ‘Wonder Woman’ cu lo tin solucionnan cu e no
tabatin antes.

Den reunionnan publico cu a tuma luga despues cu Marisol no tabata Presidente mas, su ausencia den
mayoria di e reunionnan aki tabata notabel y masha poco bes el a keda te final di e reunionnan aki y awor
ta pretende di drecha un Parlamento cu e mes no ta respeta ora cu e mester respeta esaki.

E tipo di weganan politico aki, ya no ta cuadra den e temponan aki, caminda pueblo ta mas consciente di
tur loke ta tumando luga den gobernacion y parlamento di e pais.