Page 5 - AHATA

6 LOCAL AWEMainta
Heroenan den klas:
E lucha silencioso di maestronan contra hamber
RIBA henter Aruba, un forma keto di cuido ta tuma luga den gang y klasnan di
scol—uno cu raramente ta yega den noticia. No ta trata di premio of reconoce-
mento. Ta trata di maestronan, cu ta ripara muchanan cu hamber y ta scoge, tur
dia, pa haci algo al respecto.
Hamber bou di mucha ta un problema creciente, hasta na luganan unda no ta
papia hopi di dje. Famianan ta enfrenta retonan economico, y pa algun mucha,
e cuminda cu nan ta ricibi na scol ta e unico fuente confiabel di nutricion. Pero
kico ta pasa ora cu hasta esey no ta suficiente? Ta aki cu maestronan ta drenta
aden. Sin haci hopi buya, sin warda riba maneho of programa, hopi educador
na Aruba a tuma e tarea riba nan mes pa sigura cu hamber no ta para entre un
mucha y su educacion.
Algun ta mantene un paki di snack den nan lachinan di lessenaar. Otronan ta
trece sandwich extra, fruta, of pak’i juice—’por si acaso’. Algun ta traha cu
organisacionnan local of ta pidi yudansa keto-keto den nan rednan. No pa haya
danki, sino simplemente pasobra nan ta preocupa.
E actonan chikito aki ta carga un peso enorme. Un mucha bon alimenta no ta
djis mas energetico—e ta mas concentra, mas involucra, cu mas chens di pros-
pera. Hamber no ta afecta e curpa so; e ta nubla e mente, ta caba cu motiva-
cion, y ta afecta confiansa. Ora un maestro ofrece un snack, e ta ofreciendo mas
cu cuminda. E ta ofreciendo siguridad, dignidad, y un mensahe: Bo ta importa.
Programanan manera Ban Uni Man pa Cria Nos Muchanan ta haciendo trabou
Diaranson, 29 October 2025
valioso pa sostene nutricion di mucha na scol.
Pero nan no semper ta yega na tur studiante, tur
dia. P’esey e esfuersonan aki lidera pa maestronan
ta asina poderoso—y asina necesario. Nan no ta
parti di descripcion di trabou di ningun hende,
pero toch maestronan rond di e isla ta tuma e
responsabilidad silencioso aki cu gracia. Hopi
biaha e esfuersonan aki no ta ser mira, pero nan
impacto ta innegabel.
N’e maestronan di Aruba cu den silencio ta
alimenta e futuro: Nos ta mira boso. Nos ta gradici
boso. Boso ta haciendo mas cu cualkier hende
por pidi—y mas cu mayoria lo yega di sa. Boso
compasion ta yena e bashinan cu e sistemanan no
a yena, y boso cuido ta formando e tipo di futuro
cu nos tur por ta orguyoso di dje.
Laga esaki ta un yamada pa accion tambe: Pa
sostene nos educadornan miho, pa financia
programanan cu ta sigura cu ningun mucha no ta
siña cu stoma bashi, y pa kita e carga silencioso
cu maestronan ta carga nan so. Alimenta studi-
ante no mester depende di bondad individual—e
mester ta un compromiso nacional.
Asina mes, den ausencia di suficiente, nos
maestronan ta duna tur loke nan por. No pasobra
nan tin cu haci’e, sino pasobra nan ta scoge
pa haci’e. Y den e momentonan ey di tur dia—
pasando un “granola bar” pa un mucha den nece-
sidad—nan ta recorda nos cu berdadero cambio
hopi biaha ta cuminsa cu actonan chikito y yen di
amor.
Pasobra ora nos alimenta un mucha, nos ta
alimenta un futuro. Y ora un maestro haci’e, nos
tur mester ta poniendo atencion.