Page 5 - MIN JUS

Gobierno ta confirma cu Husticia a entrega computernan di
Minister Croes bek

Tuesday, 13 June 2017 14:43
Comparti

Tabata diamars 6 di juni ultimo cu Ministerio Publico, via Landsrecherche, a entrega computernan,
celular y USB Sticks bek na Ministerio di Labor, di Minister Paul Croes. E siman aki sinembargo Bon Dia
Aruba a informa cu Ministerio Publico ta nenga cu a entrega e mandatario su pertenencianan bek.

"Ta di ken e computernan ta anto? Di ken e celular ta anto?", asina por lo menos un Minister a laga sa,
sorprendi pa e forma con Ministerio Publico ta purba trece confusion y mal informacion den un caso
serio asina. E caso a mira luz di dia riba 28 di maart 2017, ora cu mainta trempan Husticia a drenta 13
cas y oficina, buscando evidencia den e caso cu nan a duna como nomber "Ibis". Den e caso aki ta
sospecha Minister Paul Croes di a "Ambtelijke Coruptie", mal uzo di su funcion di Minister, traficacion di
hende y di labamento di placa. Te dia di awe, nunca a interoga e mandatario ni a bis'e oficialmente kico
ta e acusacionnan contra dje, ni e pruebanan. Como tal te ainda e mandatario ta siguiendo su caso den
prensa! Awe mainta nos a bishita oficina di Minister Paul Croes y a haya acceso na tur loke a entrega bek,
den cual ta obvio cu un di e computernan ta di e mandatario mes y e celular tambe. Mester ta cla cu na
ningun momento nos a bisa cu entregando e pertenencianan bek kiermen cu e ta liber di acusacion of cu
no tin nada contra dje. Locual si ta keda cuestionabel ta e forma con ta manehando e caso aki, esta cu ta
purba kibra imagen di un Minister publicamente, en bes di prepara su caso y entrege na Hues pa huzg'e.
Y na Bon Dia Aruba nos ta manda un mensahe cu nos no ta bende ni hunga cu nos integridad. Como e
media mas lesa na Aruba, ora nos publica un noticia ta pasobra asina e ta! No bay purba yama y hinca
palabra den boca di ningun Vocero pa causa mail informacion. Boso tin un otro meta cu nos den e ramo
aki, di nos ta informa, y di Boso?