Page 89 - KPA FLIP 9th APRIL,2016

Agente di Polis cu a maltrata su amiga na estado dilanti Hues

Publication: Friday, 8 April 2016. Categoria: Judicial
ORANJESTAD (AAN): Diahuebs mainta e agente di Polis F.P. a presenta dilanti Hues pa duna cuenta pa e delitonan
cu e ta worde sospecha di dje.

ACUSACIONNAN:
E promer acusacion cu Fiscal a presenta ta cu dia 10 September 2014, F.P. a maltrata su amiga kende tabata na
estado. Tambe Fiscal ta acusa F.P. cu riba e anochi di 15 y 16 Juni 2014, F.P. a haci mesun cos caminda el a hasta
dal e amiga mokete den cara.
AGENTE BURACHI A MALTRATA AMIGA:
Hues a bisa cu dia 10 September 2014 bisiña a scucha gritamento for di e cas di F.P. y a scucha e amiga bisa cu lo
mata e baby. Nan a yama Polis. F.P. lo tabata bou influencia di alcohol y a core cu e muher for di cas. Polis a
constata cu F.P. tabata bebi y cu e amiga tabatin un baby den man y tabata na estado.
Segun F.P. e no a maltrata e amiga sino a klap e na su banda. E amiga no kier a duna keho di maltrato. F.P. a bisa
Hues cu e tabata drumi burachi y tabata haci desorden. E amiga a pushe na su lomba y el a bira pas’e klap na pia.
Segun F.P. tabatin basta discussion y na dado momento el a bisa e muher cu e mester bay busca un otro lugar di
keda.
Pa loke ta e situacion na Juni 2014, ta asina cu tabatin un discussion tambe cu a escala caminda e muher a push’e cu
su pia y e ora ey F.P. a dal’e mokete.
Hues a mustra cu e muher a declara cu F.P. a maltrate formal y el a tapa su bariga pasobra e tabata na estado. Hues
a bisa F.P. cu tin potretnan di maltrato.
AGENTE A STOP DI BEBE
Hues a bisa cu F.P. ta un agente di Polis y Hues ta lamenta esaki pasobra F.P. sa masha bon cu loke el a haci no ta
bon. Hues a puntra con e situacion actual ta y con ta para cu F.P. su trabao como Polis.
F.P. a bisa cu Cuerpo Policial a brinda ayudo y el a bay cerca un trahador social, pero no tabata sinti su mes na gusto
pasobra e persona ta compara e caso cu otro persona. Despues el a bay psycologo y Reclasering pa sali for di e
problema di alcohol. Segun F.P., desde Augustus 2015 e no ta bebe alcohol mas.
RELACION DI PAREHA TA BON
El a bisa cu e tin un bon relacion cu e amiga, kende ta na Venezuela. F.P. y e amiga ta siguiendo un terapia na
Venezuela. El a bisa Hues cu nan tin plan pa casa. Tambe el a bisa cu si e haya castigo esaki por causa cu e lo perde
su trabao como Polis.
EXIGENCIA DI FISCAL
Fiscal a bisa cu e no ta haya legalmente proba F.P. a maltrata e amiga na September 2014. Na opinion di Fiscal, Polis
a presenta na e cas pero no a mira marcanan di maltrato na e amiga y tampoco e tabata keha di dolor.
Pa loke ta e caso di Juni 2014, si Fiscal ta haya proba e maltrato. Fiscal a bisa cu F.P. a admiti di a dal e muher cu
mokete na cabez. E muher a bay hospital y a constata cu e victima tabatin wowo blauw y sla tras di orea.
Fiscal a bisa Hues cu casonan asina no ta necesario castigo di prison. Mayoria di casonan asina ta worde regla cu
trabao pa comunidad. El a exigi 40 ora di trabao pa comunidad of 20 dia di prison. Fiscal a bisa cu mester kita 14 ora
pa e 7 dianan cu e agente tabata sera.
DEFENSA ABOGADO
Mr. Bryson ta comparti punto di bista di Fiscal cu na September 2014 no por papia di maltrato. E otro caso e no ta
defende F.P. y ta referi na decision di Hues.
SENTENCIA
Hues a sera tratamento di e caso y dicta sentencia di biaha. Hues a bisa cu e tambe ta declara F.P. liber di e promer
acusacion y ta confirma exigencia di Fiscal. Hues a bisa cu como Polis spera cu F.P. lo sa di drecha su bida manera e
ta haciendo.