Page 18 - AWE2108.indd

UN SNECHI DI PALABRA DI DIOS

XXI DIADOMINGO DEN AÑA 22 di augustus 2021 nr. 325

I lect: Yoz 24, 1-2a.15-17
Salmo: 34
II lect: Ef 5, 21-32
Evangelio: Hn 6, 60-69
Den e tempo aya hopi di e discipelnan cu a tende Hesus papia, a bisa: “E palabranan ta masha duro! Ken
por para scucha nan?” Hesus tabata sa cu nan tabata murmura. El a bisa nan: “E cos ta ofende boso?
Supone cu nos mira Yiu di hende subi bolbe bay caminda E tabata prome! Loke ta duna bida ta Spirito di
Dios, naturalesa humano no por yuda cu nada. E palabranan cu Ami a papia cu boso, ta bini di Spirito di
Dios y nan ta duna bida. Sinembargo tin algun di boso cu no ta kere.” Loke ta pasa ta cu Hesus tabata sa di
antemano ken ta esnan cu no ta kere y ken t’esun cu lo traicion’E. El a añadi: “P’esey mes Mi a bisa boso
cu ningun hende no por bini cerca Mi, si Tata no permitie!” Ora Hesus a papia asina, hopi di su discipelnan
a bira bek y no a sigui cana hunto cu nE mas. El a bisa e diesdos discipelnan: “Basta boso tambe no kier
bay, no?” Simon Pedro a contesta: “Señor, cerca ken nos tin cu bay? Abo tin e palabranan cu ta duna bida
eterno!” Nos ta kere y nos a haya sa cu Abo ta e Santo di Dios.”

Palabra di Señor.

MENSAHE

Palabranan relaciona cu Eucaristia no ta facil pa compronde.
Pero no ta trata pa compronde nan sino pa kere den nan ya cu ta palabra di Hesus mes. Pedro tampoco a
compronde nan, pero e no ta duda den Hesus, p’esey el a declara: “Señor, cerca ken nos tin cu bay? Abo tin e
palabranan cu ta duna bida eterno!”
Nos no por bisa cu nos ta kere den un palabra di Hesus y den otro no. Si nos ta scoge djis algun mensahe cu ta
facil y comodo, su palabra lo no ta pa nos palabra di bida. Si nos lo a tuma na serio palabranan di Evangelio
di awe, nos lo haci tur cos posibel pa nunca falta un eucaristia caminda nos por ricibi curpa y Sanger di Cristo.
Hesus ta bisa: “Esun cu ta come mi carni y bebe mi sanger tin bida eterno, anto Ami ta lant’e fo’i morto riba
e ultimo dia”. E palabra aki ta masha cla: pa nos haya bida eterno nos mester ricibi Curpa y Sanger di Hesus.
Nos tin mester di e alimento aki pa avansa riba e caminda di fe, y pa no perde nos union cu Dios y nos prohimo.
Si ainda bo ta ignora participacion den Santo Sacrificio di misa esey ta un señal cu ainda bo no ta kere den e
palabranan di Hesus y bo tin mester di combersion.
Ora nos ta ricibi eucaristia cu fe y na un manera digno, nos ta bira un cu Hesus. Esey ta e esencia di Santa
Comunion. Nos lo cuminsa parce Hesus. San Agustin a bisa: “Ora boso come y bebe Curpa y Sanger di Hesus,
nan ta cambia boso y boso ta transforma den Curpa di Hesus”. Danki na Eucaristia nos por parce Hesus cada
dia mas y mas. Y di e manera aki nos ta agrada Dios Tata y E por reconoce den nos imagen di Su Yiu stima –
Hesus Cristo.

ORACION

Señor mi no ta digno pa bo drenta den mi curason, pero bisa un
palabra di pordon y lo mi ta cura.
PROPOSITO
Pone mas atencion pa ricibi Santa Comunion na un manera digno
y cu mas respet y devocion.