Page 20 - AM230215

20 AWEMainta Diaranson, 15 Februari 2023

Fortaleza Pa Famia

Esun cu ta stima, mester conoce pordon

TA existi cuater tipo di amor:
Amor Agape, cual ta e amor incondicional di Dios, cual ta esun di mas halto.

Amor Phileo cual ta e amor di ruman y amistad.
Amor Eros cual ta e amor di romantico, cu Dios a establece solamente entre homber y muhe.
Amor di Mayor, of amor di afeccion y aprecio natural cu ta e amor entre mayor y yiu of amor di famia.

No ta cumbini ningun hende pa gaña stima pasobra bo ta gañando bo mes y bo ta herida otro hende. Amor no por wordo
cumpra cu flor pasobra amor ta un expresion profundo cu ta sali for di bo curason y cu ta Dios a pone den hende.

P’esey tur relacion amoroso entre homber y muhe ta pasa den prueba ,pa nan crece y para stabiel banda di otro manera

Dios a establece den Genesis 1:27+28 y Genesis 2:22-25.

Ora hende ta stima otro di berdad, ta keda demostra cu no ta pa placa, posicion, negoshi, pero nan a conoce e amor
berdadero cu ta bini for di Dios, cual ta nifica cu nan ta stima y tambe nan ta pordona otro.

Aunke nos tabata biba antes den pica toch Dios a stima nos y a manda Su Yiu unigenito pa ken cu kere den dj’E no bay
perdi ma tin bida eterna (Juan 3:16).

Orguyo, Arogancia, y falta di pordon, no por wordo scondi tras di regalo, flor, of un invitacion pa dinner. Pero ta cosnan
cu nos mester tuma tempo pa drecha, sino nan lo ta piedra di trompica den nos bida.

Cerca Señor nos Dios tin compasion y pordon, maske nos a rebeldia contra dj’E.( Daniel 9:9).

Ta masha importante cu den matrimonio y famia, Señor nos Dios tin e prome luga, pa asina amor y pordon por biba hunto,
pasobra hopi biaha hende ta pretende algo emocional, pero den esey no tin amor. Ora algo sosode den famia of den rela-
cion matrimonial, semper mester trece e asunto dilanti di Dios, y Dios den su misericordia lo toca cada curason pa drecha

e relacion, y restaura e famia.

Pasobra Señor ta odia divorcio (Malaquias 2: 16) y tambe violencia relacional, Señor ta odia maltrato den matrimonio.
P’esey pone atencion na boso spirito pa boso no trata cu traicion. Den Señor no tin cuenta di biba, y laga biba, Señor nos

Dios ta un Dios di respet y orden, Señor kier lo miho pa Su yiunan. Señor no ta desea pa Su yiunan ta biba den adulterio,
inmoralidad, Señor kier pa cada homber tin su propio muhe, y Señor kier amor berdadero entre parehanan sin nada di
fingimento.

Ta deseo di Señor pa mayornan stima nan yiunan, y no laga nan biba con cu ta, pa asina diabel no destrui nan (Juan
10:10), y ta deber di cada mayor pa lanta su yiunan den caminda di Señor.

Mayor mester stima, y pidi Dios proteccion pa nan yiunan, pasobra nos ta bibando den tempo trabahoso, caminda hende

ta stima placa y placer mas cu Dios, caminda hende ta apoya y defende maldad tur dia. Si nos no ta pordona nos ruman
Dios tampoco ta pordona nos. Cuanto biaha nos no ta mira muchanan ta bay perdi, pasobra nan mayornan no kier
pordona y comunica cu otro.

Palabra di Dios ta bisa den Marco 11: 25: Ki ora cu boso ta para haci oracion, pordona si boso tin algo contra algun
hende, pa boso tata cu ta den cielo, tambe pordona boso, boso trangrecionnan. Ma si boso no pordona, boso Tata cu ta
den cielo tampoco lo pordona, boso, boso trangrecionnan.

Sinceramente, Pastor Marcel Balootje