Page 14 - Min.On Feb 20, 2015

Studiantenan ta hunga un rol importante den desaroyo di
Universidad di Aruba

Thursday, 19 February 2015 18:20
Comparti

Durante un encuentro masha ameno, Minister Michelle Hooyboer–Winklaar a ricibi e directiva nobo cu
lo encabesa e conseho di studiantenan na Universidad di Aruba.
Ta trata aki di hobennan cu pa un aña largo lo trata na sali na defensa di tur loke ta concerni e studiante
di Universidad di Aruba, su luga di studia, e facilidadnan y tambe cambionan cu lo por facilita e studio y
su procesonan. A instala e conseho di studiante di Universidad di Aruba of “Studentenraad” pa prome
bes dia 16 di November 2012 y ta consisti di un representante di cada facultad, eligi dor di e propio
studiantenan. E conseho di studiante ta dedica nan tempo liber na representa tur studiante. Nan ta sirbi
como bos di e studiante y ta intermedia y brinda sosten y bienestar na e studiante di Universidad di
Aruba. Minister Michelle Hooyboer–Winklaar a hiba un combersacion cu Brian Vieira y Chris Habibe
den nan calidad di Presidente y Vice Presidente di e conseho nobo, repasando asina e cambionan cu por
spera pa aña 2015. Un punto cu sigur ta hiba atencion di e mandatario ta balor di un estudio superior y
con pa haci esaki mas accesibel pa e studiante. Tambe e rol di importancia cu acreditacion tin pa un
Universidad y ki balor esaki ta hunga pa esun di Aruba. E hobennan a scucha e consehonan y a delibera
cu e mandatario riba varios oportunidadnan cu nan rol como futuro lidernan lo por hunga pa trece
cambionan structural na e luga di studio. Por a sinti e chispa hoben di innovacion y e gana di traha na
bienestar di nan pais y sigur e experiencia di a studia den exterior pa hopi aña ta hunga un rol visibel den
nan actuacion y determinacion. E posibilidad di atrae studiantenan di exterior of crea un intercambio cu
universidadnan den otro region ta riba lista como prioridad pero tambe e diferente opcionnan pa yega na
crea fondonan pa mehora e posicion di e localidadnan y studiante. Mientras Minister Michelle
Hooyboer–Winklaar ta splica e plannan cu su Ministerio tin caba den e area di Enseñansa Superior. “Mi
ta desea boso hopi exito y e porta ta habri pa nos combersa y yega na solucionnan na bienestar di
Enseñansa” e mandatario ta enfatisa.

http://www.24ora.com/local-mainmenu-5/92032-studiantenan-ta-hunga-un-rol-importante-den-
desaroyo-di-universidad-di-aruba
http://masnoticia.com/studiantenan-na-utrecht-hopi-satisfecho-cu-informacion-encuanto-seguro/