Page 16 - ARUBA BANK

Pa e ocasion aki un biaha mas e comision di Departamento di Cultura Aruba
consistiendo di empleado di dicho departamento, en cooperacion cu Ministerio di
Cultura, manera un custumber tin un programa bon prepara, E programa 2018 pa
celebra Fiesta di San Juan mihor conoci como Dera Gay ta consisti di lo siguiente:

– actividad educativo y informativo pa scolnan tanto basico y preparatorio;

– actividad pa publico general.

Cu esaki nos ta encera actividad educativo pa scol basico y preparatorio y actividad
tambe pa publico general pa promove y mantene e celebracion tradicional di Dia di San
Juan Dera Gay.

E programa educativo a inicia ayera diamars 12 di juni y lo finalisa dia 22 di juni 2018,
sigur dos siman consecutivo muchanan lo bai gosa den Cas di Cultura, cu dos funcion
cada dia, e prome ta cuminsa pa di 8’or y mey pa 10’or di mainta y e segundo funcion

lo ta di 10’or y mey pa 12’or di merdia.

E promer dia un cantidad di di alumnonan di scolnan preparatorio y basico a atende y
siña di e presentacion den Cas di Cultura. Tin un grupacion musical consistiendo di

empleadonan di Departamento di Cultura mes, y reenforsa pa otro musico amigo, cu lo
bai deleita e muchanan cu musica di San Juan y tambe Tipico. Ademas a duna
demostracion di e celebracion di e Fiesta di San Juan y Dera Gay.

E demostracion y presentacion ta encera comparti informacion tocante e historia y su
origen, unda cu e Fiesta di San Juan a cuminsa y tambe e baile di Dera Gay. Ademas ta
duna splicacion di musica folclorico, principalmente e cantica di Dera Gay.

Meta di actividad

E meta di e actividad ta pa educa y informa tanto e muchanan local y emigrante
encuanto e tradicion di Fiesta di Dera Gay na un forma dibertido. E formacion aki ta

contribui na mantene y Promove nos folclor, cultura pa asina atrabes di e mucha
otronan tambe por haya aprecio pa nos cultura.