Page 9 - ARUBA BANK
P. 9
E programa educativo a inicia ayera diamars 12 di juni y lo finalisa dia 22 di juni 2018, sigur dos siman
consecutivo muchanan lo bai gosa den Cas di Cultura, cu dos funcion cada dia, e prome ta cuminsa pa di 8’or y
mey pa 10’or di mainta y e segundo funcion lo ta di 10’or y mey pa 12’or di merdia. E promer dia un cantidad
di di alumnonan di scolnan preparatorio y basico a atende y siña di e presentacion den Cas di Cultura. Tin un
grupacion musical consistiendo di empleadonan di Departamento di Cultura mes, y reenforsa pa otro musico
amigo, cu lo bai deleita e muchanan cu musica di San Juan y tambe Tipico. Ademas a duna demostracion di e
celebracion di e Fiesta di San Juan y Dera Gay.
E demostracion y presentacion ta encera comparti informacion tocante e historia y su origen, unda cu e Fiesta
di San Juan a cuminsa y tambe e baile di Dera Gay. Ademas ta duna splicacion di musica folclorico,
principalmente e cantica di Dera Gay.
Meta di actividad
E meta di e actividad ta pa educa y informa tanto e muchanan local y emigrante encuanto e tradicion di Fiesta
di Dera Gay na un forma dibertido. E formacion aki ta contribui na mantene y promove nos folclor, cultura y
asina atrabes di e mucha otronan tambe por haya aprecio pa nos cultura.
Minister di Cultura y Comision Celebracion Dianan Nacional ta sostene tur organisacion y clubnan cu ta
organisa e evento di San Juan y Dera Gay aki den nan bario y ta invita tur organisador pa tuma contacto cu
Departamento di Cultura Aruba na telefoon 582-2185 tambe por manda informacion na info@cultura.aw, of
pasa personalmente na Horizonte Building riba L.G. Smith Boulevard banda DA, prome piso, pa asina informa
di nan actividad pa e por bin den e calenderio di actividadnan di Fiesta di San Juan y tambe corda pa entrega
bo peticion pa e ayudo financiero “subsidie” y of den forma di material manera tent y baricada na tempo pa cu
e festividad ariba menciona.
Tambe pa e aña aki un biaha mas lo bai duna reconocemento na un di e barionan cu ta organisa e tradicional
fiesta di San Juan regularmente y tur esaki lo bay ta dia 24 di juni mes cu ta dia di San Juan “Dera Gay”.
