Page 7 - MIN ON 12 MAART 2016

Crystal Andrus Morissette: Comunicacion efectivo ta esencial
pa e ser femenino gara mas oportunidad den su bida

Thursday, 10 March 2016 20:58
Comparti

Crystal Andrus Morissette ta un cara conoci caba na Aruba. El a bolbe nos isla pa e di cuater biaha pa ta
un orador na Women's Day Conference 2016, organisa pa Centro pa Desaroyo di Hende Muhe y
Ministerio di Enseñansa y Asuntonan di Famia.

Crystal Andrus Morissette a bisa di e conferencia cu e tabata un encuentro increibel di muhenan
espectacular; hende muhenan cu ta reconoce y realisa kico nan por haci ora cu nan ta traha den union. E
hende homber mester di e tipo di encuentronan aki tambe, el a agrega. El a splica cu e conferencia no
tabata solamente y simplemente tocante di hende muhe y e hende muhe empodera; e tabata tocante di
con e hende muhe por sanea su mes y di berdad ta un partner den su relacionnan y ta completo como
mama, y simplemente pa ta consciente di e forsa cu e hende muhe tin.

Crystal Andrus Morissette a subraya cu un di e puntonan mas importante di e evento, cu a tuma luga
diamars riba Dia Internacional di Derechonan di Hende Muhe, tabata e combersacion tocante di
comunicacion.

E hende muhe tin cu siña y por siña con pa comunica su necesidadnan, y en general mester siña con pa
comunica pa wordo scucha na Un manera efectivo y clave.

E ser femenino ta cariñoso, ta stima, ta esun cu ta cuida, y tin sabiduria, y si e no ta expresa na un forma
cu e ta wordo scucha tur e caracteristicanan y talentonan di e hende muhe ta bay perdi.

Ta esencial pues pa e hende muhe comunica miho pa su necesidadnan wordo atendi manera debe ser,
Crystal Andrus Morissette a conclui bisando.