Page 17 - ATA SEPT 3,2015
P. 17
AWEMainta Diahuebs, 03 September 2015 15
Matanan local cu
sistema di irigacion
solar formando parti
di Linear Park Fase II
DURANTE bishita di Minister Otmar Oduber na Fase II di Linear
Park unda cu ta plantando matanan pa haci di e parke lineal aki
uno mas bunita, a combersa cu e representante di e compania cu
ta realizando e trabou aki y tambe cu e persona encarga di DOW pa
cune. Frank Geerman di Fantastic Gardens a duna di conoce cu tin
un total di 128 mata cu lo wordo planta manera ta matanan grandi
di Aruba y matanan chikito (struiken) pa haci e area mas bunita.
E compania a haya 60 dia pa realiza e proyecto, a cuminsa na
inicio di juli y lo finaliza prome cu fin di september. Ta trata di un
inversion di rond di 315 mil florin cu a wordo financia dor di TPEF.
Pa loke t’e dripsystem of sistema di irigacion, sr. Geerman a bisa
cu esaki ta bay atrabes di un timer cu ta wordo maneha atrabes di
energia solar cu un extencion di e proyecto di 1.3 kilometer parti
den dos zona. E sistema aki ta funcionando otro camindanan pa
varios aña caba y ta bayendo bon, locual ta duna un siguranza cu
e lo funciona bon y lo tin durabilidad na Linear Park.
Franklin Figaroa, lider di proyecto den diseño y planeacion di
DOW a bisa di su banda cu tabatin hopi peticion di pueblo pa haci
e fiets y voetpad mas atractivo y pesey e necesidad di trece mas
berde den dje tabata necesario. Tambe sr. Figaroa a bisa cu e area
ta uno dificil pa matanan dor cu e ta uno cu ta wordo usa tambe
pa companianan di utilidad unda tin hopi kabel y tuberia bou di
tera, ademas cu Aeropuerto tambe tin su exigencianan.
Teniendo na cuenta tur esaki a busca matanan cu ta wordo usa
den nos hofinan y matanan tipico di Aruba manera Bonchi Strena,
Camari, Kibrahacha, Huliba, entre otro.
Franklin Figaroa a expresa cu e matanan aki ta hopi dificil pa haya,
pero cu ta importante pa usanan den e proyecto aki, pasobra ta
trata di nos mesun matanan tipico.
