Page 9 - AWEMAINTA
P. 9
Diaranson, 30 Mei 2018 AWEMainta 9
Minister Blok a enfatisa:
Hulanda NO ta ricibi
refugiadonan di Venezuela
NO POR papia di refugiadonan di Venezuela
cu ta pasa bay pa Hulanda. Minister Blok, di
Relacionnan Exterior, ta bisa cu Hulanda a ofrece
ayudo tecnico na Aruba y Corsou, riba con pa
anda cu refugiadonan. Na mesun momento a
enfatisa cu ta trata aki di dos pais independiente
denter di Reino y cu pa tal motibo, e paisnan aki
tin nan mesun responsabilidad pa soluciona nan
problemanan.
Palabranan duro expresa door di e mandatario
Hulandes y cual a keda publica den prensa di
Hulanda tambe.
E declaracionnan aki di Blok a bini algun dia
despues di eleccion di Presidente Nicolas
Maduro. El a bisa “e eleccionnan ey no tabata
eleccionnan liber y independiente. Mi ta mira
e situacion cu hopi preocupacion, ta keda un
presion riba e hendenan pa nan bandona e pais.”
El a enfatisa cu mester haci un diferencia entre
esnan cu ta huy pa motibonan economico, cu un
pais no ta obliga pa ricibi nan, y refugiadonan
politico. “ Berdadero refugiadonan politico
mester wordo ricibi a base di Acuerdo di
Refugiado.”
E hendenan ta bandonando e pais masalmente,
hasta e indiannan Warao, kendenan ta trata di
yega Colombia.
E reaccion aki ta bini probablemente door di
comentario recien di Prome Minister Evelyn
Wever Croes kende a ataca Hulanda cu no ta
haciendo nada pa yuda e islanan cu e problema
di refugiadonan.
Miembro di Tweede Kamer pa VVD Ten Broeke a
expresa publicamente cu e tin miedo cu Maduro
ta hibando Venezuela den un abismo, vu un
fluho grandi di refugiado cu ta coy direccion di e
islanan Hulandes. E islanan no ta cla pa ricibi
cantidad grandi di e hendenan aki. El a adverti
algun aña pasa caba cu Hulanda y e islanan
mester tuma medida. Esaki ta un accidente cu
a anuncia su mes. Pero asina mes e ta bisa cu
Hulanda no mester otorga asilo na refugiadonan
di Venezuela.
E miembro di CDA Van Helvert ta cataloga e
situacion di Venezuela como horibel. “Awo
caba tin refugiadonan ta yegando Hulanda.
E pregunta ta si nos visualisa e grandura di e
problema, pasobra e islanan ta hopi chikito.”
Karabulut di SP no ta kere cu e problemanan ta
wordo soluciona di un dia pa otro. “Nos mester
pensa con por brinda apoyo na e Venezolanonan.
Bo mester ta prepara pa e problemanan.”
Otro siman Tweede Kamer tin un debate cu
Minister Blok riba e desaroyonan aki.
