Page 2 - S.E.A
P. 2
26 AWEMainta Diahuebs, 23 Maart 2017
Celebracion di
PURPLE DAY na
Kleuterschool
Rayo di Solo
PURPLE DAY ta un evento internacional cu e meta pa conscientisa e co-
munidad riba epilepsia cu ta wordo teni tur aña riba 26 di maart. E evento aki
a wordo funda na 2008 na Nova Scotia, Canada dor di Cassidy Megan di 9
aña cu sosten di e organisacion di epilepsia di Nova Scotia. Cu esaki Cassidy
cu tabata sufri di epilepsia, kier a logra cu un persona cu tin epilepsia, no kere
of sinti cu e ta su so. Por combersa y informa otro tocante epilepsia. Ta asina
por elimina mito- y taboenan rib’e malesa aki.
Na 2009 e organisacion di epilepsia di Nova Scotia y esun di New York na
Merca a uni forsa y asina e PURPLE DAY a bira internacional. A scoge pa e
color biña, lavendel, bira e color internacional pa epilepsia y pesey ta pidi pa
mas tanto posibel hendenan bisti na biña rib’e fecha menciona.
Miyones di hende na mundo ta sufri di epilepsia. Por bisa cu 1 riba cada 100
hende por haya un atake di epilepsia den nan bida y p’esey ta hopi importante
pa nos comunidad wordo conscientisa rib’e enfermedad aki. Cu e meta aki na
2007 Stichting Epilepsie Aruba (SEA) a wordo lanta, pasobra no tabata existi un
organisacion unda e pashent y su famia por a haya informacion rib’e tereno aki
cu tur su consecuencianan. Cu ayudo di e. o. dokter- y otro personanan activo
riba epilepsia, nos fundacion riba un base regular ta tene anochi di informacion
cu charlanan rib’e malesa aki.
Tambe nos ta tene lectura pa e scolnan y otro organisacionnan y cada biaha
ta resulta cu nos comunidad tin necesidad grandi na informacion debido riba
epilepsia. Y den e cuadro aki SEA a dicidi cu e aña aki atrobe, mescos cu den
pasado, lo organisa un celebracion di PURPLE DAY na un scol. E biaha aki
esey lo sosode na Kleuterschool Rayo di Solo na San Nicolas.
Como cu PURPLE DAY e aña aki ta cay riba un diadomingo, lo tene e cel-
ebracion diabierna 24 di maart 2017 unda Minister di Enseñansa sra. Michelle
Hooyboer-Winklaar tambe lo ta presente y lo hiba palabra.
Directiva di Rayo Di Solo a organisa un mainta masha interesante pa nan
chikitinnan:
1. Nan lo canta un cantica cu scol mes a compone tocante epilepsia
2. Lo tin un exposicicion di pintura traha dor di e chikitinnan tocante epilepsia
3. Nan lo los algun blaas bina cu cada un tin un mensahe riba epilepsia
Palabranan di gradicimento ta bay na Directiva di Kleuterschool Rayo Di Solo
cu a coopera tremendamente pa SEA por tene e evento aki na nan scol y na
Minister Hooyboer-Winklaar cu lo honra nos cu su presencia.
Un danki grandi tambe ta bay pa SUBWAY ARUBA cu a sponsor e evento aki.
Un tremendo gesto! Corda cu un hende cu epilepsia por hiba un bida normal,
basta e ta na haltura kico ta epilepsia y e sigui instruccion di su dokter.
