Page 24 - AWEMAINTA

24 AWEMainta Diaranson, 9 Mei 2018

Inauguracion di caha di orgel “Johanna”

DIA DI Trahador ultimo, e unico lugar caminda
“abo no ta wak nan, pero nan si ta wak bo”, esta
La Roca Rum Shop situa na Moko, tabatin un
evento hopi special.
E rumannan morocho Andres y Martin Figaroa
tabatin e honor di inaugura nan caha di orgel
dedica na nan querida mama sra. Johanna
Figaroa.
Ya pa 12’or di merdia, basta fanatico di bon
cah’i orgel tabata presente p’asina pa 1’or por a
bautisa e caha y prome piesanan cuminsa skeiro.

Mester bisa cu e merdia ey tabatin basta cara
nobo na La Roca, hendenan cu pasion p’e ritmo
dushi y clasico di nos caha di antaño.
Cos tabata masha bon te ora cu Andres a pone
man n’e handle di e caha y cuminsa drai. For di
e momento ey cos a bay di bon pa exelente!
Amantenan di musica di caha a cuminsa marca
paso cu’n ta co’i papia y na un manera masha
bunita y profesional.

Na banda tabatin varios cliente cu no por sinta
keto y a grab un wiri y cuminsa compaña e caha.
Despues di Andres, La Roca tabatin e honor di
tin varios tocado di caha legendario pa deleita
esnan presente, entre nan e legendario Patan
Farro! All in all, tabata un atardi sumamente
exitoso, y ta hopi a keda wak cu asombro ta
cuanto amante di bon caha di orgel a sali for di
tur skina di Aruba pa bin disfruta e ocacion aki.

Na e rumannan Figaroa un palabra grandi di
pabien, y cu sra. Johanna y e caha cu ta carga
su nomber na su honor por tin un bida largo y
exitoso!