Page 41 - MIN JUS

Chris Dammers: Reunion positivo cu CAFT riba rapport
prome kwartaal di presupuesto 2017

Thursday, 29 June 2017 20:55
Comparti

Diaranson Parlamento di Aruba a aproba e ley cu ta autorisa Minister di Asuntonan Economico pa haci
un pago na ex-empleadonan di servicio di Telecomunicacion di Aruba SETAR, prome cu el a bira un NV.
Minister Arends a splica con esaki a cana.
"Na 2003 a surgi un disputa despues di a firma a statuto social di e privatisacion di SETAR. Tabatin un
discrepancia den e definicion kico ta e base pa e afvloeiingsregeling." Minister Arends a bisa cu e
discrepancia aki a causa cu a start un procedura legal cu a dura 14 aña. Un eternidad y sin duda un
asunto tristo si tene na cuenta cu aki ta papia di hende grandi caba. "For di 2003 cu e asunto aki a start, e
gobierno di e tempo ey a obstaculisa e caso aki, sin tabata necesario."
Minister Arends: "Na 2015 hues specificamente a dicta na fabor di 32 empleado. E demas 60 empleado
no a haya un sentencia di hues. Aña pasa Minister de Meza hunto cu Prome Minister Mike Eman y
sindicato SEPPA a yega na un acuerdo di principio unda ta trata tur empleado di e mes manera. A traha
diligentemente riba un ley unda ta pidi autorisacion na Parlamento pa por efectua e pago aki di mas di 4
miyon florin na e 92 trahadonan."

Arends a bisa cu ta importante pa subraya cu aki no ta SETAR a paga, pero pais Aruba a uza su fondonan
pa paga e suma aki na e 92 trahadonan. "Un deuda cu tabata pendiente di 2003. Awor a cumpli y ta trata
tur 92 empleado igual, compensando nan cu e suma aki. Cada empleado ta haya un suma diferente,
dependiendo di aña di servicio, pero e suma total ta surpasa algo mas di 4 miyon florin." Arends a splica
tambe cu e suma ta bay bek cu forsa retroactivo for di 21 di juni 2006, incluso interes legal pa tur 92
empleado. Minister Arends a bisa cu ya pa otro siman e ta sinta cu Departamento di Finanzas y
Departamento di Asuntonan Huridico, cu SEPPA y representante di e pensionadonan pa denifini cua ta e
forma mas deligente y lihe pa efectua e pagonan. "Tambe pa pais Aruba haya comprobante di pago final
di e suma aki." Herederonan di e empleadonan cu a fayece den e periodo di 14 aña aki ta haya un suma
cu ta coresponde na nan.
E pensionadonan di SETAR cu ta bay haya e placa cu nan tin derecho riba dje ta sigui cobra nan pensioen
despues. "Esaki tabata meramente un areglo di pago pa esnan cu a bin na remarke p'e na momento cu
SETAR a wordo independisa." Minister a gradici Parlamento pa a trata e ley y vota na su fabor. "E
pensionadonan a keda masha contento mes. Nan tabatin hopi pasenshi. Mi no por caba di splica e
cantidad di tempo y esfuerso cu tur hende a hinca den e caso aki. Den tur e calculacionnan cu a wordo
haci, cuanto placa cada un tin derecho riba dje y tambe danki na huez cu a duna e indicacion con yega na
e salario bruto. Un manantial di alegria cu awor despues di 14 aña a yega un fin na e odisea di e
empleadonan aki."