Page 6 - WEB

ORANJESTAD(AAN)–E dia importante pa Aruba pa cual DIARIO a spierta, a yega.

Mañan Asamblea Nacional di Venezuela ta dicidi si Juan Gerardo Guaidó Marquez ta
keda e Presidente Interino di Venezuela cu tin sosten di mas cu 50 pais na mundo.

Si Asamblea Nacional dicidi cu e ta vota pa otro Presidente pa loke ta Parlamento di
Venezuela, automaticamente Guaidó mester baha como Presidente Interino y dirigente
di Citgo cu ta perde tur e derechonan special cu Merca a entrega na Guaidó si Merca no

acepta eventual cambio.

Ora mañan Asamblea Nacional dicidi kico ta pasa, no solamente Aruba mester acepta
cu ta bini of no ta bini un Presidente Interino nobo. Aruba dor di e contracto cu

gobierno Mike Eman a firma cu Nicolas Maduro, lo wordo directamente afecta.

Si Guaidó keda, e lo mester sigui cu e negociacionnan pa pone un fin na e acuerdo
entre Aruba y Citgo manera ta sosode actualmente.

Si bini cambio, Aruba mester mira kico esaki lo nifica pa Aruba, caminda gobierno
Wever-Croes a mustra cu su rason, cu Aruba no tin ningun base legal pa defende su
mes di acuerdo cu e contracto firma dor di Mike Eman y Nicolas Maduro.

Manera DIARIO a spierta na hopi ocasion, e entrega di combustibel na Aruba a keda
den man di Citgo, cu ta existi ainda pasobra Presidente Donald Trump a duna su
cooperacion.

Na momento cu e cooperacion stop, negoshinan Mericano y banconan internacional cu
Venezuela debe hopi placa lo confisca e parti liber di Citgo cu ta mayoria. Rusia ta keda
liber pa haci loke e kier cu su borg.

E situacion di prome Diadomingo di 2020, tin su reis na e hecho cu Gobierno Mike Eman
a negocia cu Nicolas Maduro na momento cu ya mayoria di Venezuela a bira lomba pa
Nicolas Maduro.

Na 2016, mientras gobierno Mike Eman tabata negocia cu Nicolas Maduro, e pais a
conoce un Asamblea Nacional cu no tabata sostene Nicolas Maduro, cu a pidi e Corte
Superior cu e tabata domina pa kita poder for di Asamblea Nacional.