Page 102 - MIN.PAUL CROES

Lucy Kock a gana 100 florin di gasolin for di Refineria di
Aruba

Sunday, 23 October 2016 21:18
Comparti

“Masha danki, masha danki, mi ta hopi contento”, asina Lucy Kock di Caya St. Lucia # 18
a bisa na momento cu apenas a habri e portanan di Carnival Village y el a drenta bay paden topa cu
Francie Solognier-Croes, ehecutivo di Refineria di Aruba, entregando e un premio. E no a spera di gana
nada, pero el a bin trempan pasobra e kier a participa si.
A anuncia di trempan caba cu entre 4:00pm y 7:00pm tur hende cu drenta Carnival Village pa e evento
“Aruba ban Celebra...Refineria di Aruba porfin ta en nos man!” lo participa pa gana bon di gasolin, pa
cortesia di Refineria di Aruba y Fuels Marketing & Supply Aruba. E compania cu a bira oficial desde 1 di
october 2016 a celebra varia logro diasabra, no solamente cu a habri nos refineria atrobe, sino cu pa
prome bes den 92 aña Aruba mes ta doño di e refineria y na mes momento cu Aruba mes a bira doño di e
stacionnan di e gasolin cu tabata pertenece na Valero y di e compania cu ta entrega combustibel na e otro
stacionnan y na avionnan, esta Fuels Marketing & Supply Aruba.
Mescos cu Lucy Kock, asina decenas di otro hende a gana premio diasabra, mientras cu algun mil a yena
ticket pa participa. Lucy Kock a ricibi 4 bon di Afl. 25,= cada un pa e por yena e tanki di gasolin di su auto
y asina sinti’e orguyoso di e logro historico aki pa nos pais y pa nos pueblo. Pabien na tur e
participantenan y na e ganadonan!