Page 21 - HOH

Empleadonan di departamento di Botica a sali pafo ya cu tabatin mesun kehonan di siman
pasa manera dolor di garganta y dolor di cabes. Gerente a yama di biaha pa midi y controla
e aire den Botica. E resultado a mustra nada particular. Pues, no tin causa conoci ainda pa
cu esaki. Empleadonan di Botica a reanuda trabao pero lo sigui haci investigacionnan pa
perserva e bon salud di e empleadonan.

Pa loke ta e sala di operacion tambe algun empleado a sinti malo y a notifica AO conforme
protocol. A pidi ayudo na Brandweer cu a midi y no por a constata peliger.

No tabatin holor penetrante e biaha aki, pero teniendo e proteccion di pashentnan y alavez
empleado na cuenta a dicidi pa atende solamente pashentnan cu ta caso di emergencia. Pa
tur otronan lo planea un dia di operacion nobo. Un decision siguramente no facil pero
necesario pa cu e salud di pashent y empleado cu ta drenta diariamente.

Pa motibo di varios notificacion di AO na e sala di operacion lo sigui drey un programa
adapta mientras lo sigui comunica cu e personanan concerni. Hospital ta pidi comprension y
cooperacion pa asina por continua e proceso di cuido na un manera sigur y optimal.

Siman pasa dialuna tambe tabatin un problema cu aire na departamento di Radiologia unda
algun empleado a notifica AO. A haya e causa y a soluciona e problema di aire y desde
diahuebs siman pasa e departamento aki ta funciona normal back.

E motibo di e problema di aire na Botica y sala di operacion no ta mustra di ta igual y pa tur
dos ta conta cu ainda esakinan ta desconoci.

Hospital ta pidi disculpa pa e inconveniencia y ta sigui cu investigacionnan y ta spera di por
resolve e problema aki lo mas pronto posibel pa asina por sigui brinda nan servicio normal
back.

http://www.diario.aw/2018/03/hospital-a-revela-diabierna-cu-nan-ta-investigando-problema-cu-aire/