Page 32 - ATA

Un reunion a tuma lugar entre Minister di Infrastructura y Medio Ambiente Otmar Oduber,
Minister di Turismo Dangui Oduber y ATA, pa trata continuacion di diferente proyectonan pa
San Nicolas. Minister Otmar Oduber ta splica:

‘E reunion tabata sumamente fructifero y hopi positivo, colega Oduber di Turismo y mi
persona riba invitacion di ATA a realisa e reunion aki a base di proyectonan cu kier pa
continua na San Nicolas. Den pasado mi tabatin e honor di por a carga e cartera di Turismo,

pa cual mi a combersa cu colega Minister actual riba e importancia di e desaroyonan aki.
Minister Dangui Oduber desde inicio a mustra interes y ta mira e necesidad pa sigui pusha pa
San Nicolas.’

A hiba combersacionnan cu a wordo laga atras di e Culture and Heritage City di San Nicolas, unda

cu ATA tabata un miembro instrumental den e plataforma cu tabatin. Despues di e reunion a tuma
decision conhunto riba e aspecto di ‘branding’ pa San Nicolas. Lo acerca Ministernan encarga cu

Cultura y Transporte cu ta forma e 4 Ministerionan cu ta sumamente importante pa e desaroyo na
San Nicolas. Lo reuni y percura pa continuidad di e trabounan cu tabata tuma lugar.

Den e reunion cu ATA ya caba a papia riba cierto proyectonan cu lo pone enfasis riba dje. Manera e
arte di Lolita, di Changa y Uncle Louis Store. Ya caba a combersa cu Fundacion Museo Arubano

(FMA), cu tambe ta cla pa continua cu e proceso pa haci di Nicolaas Store un museo di comunidad
na San Nicolas. Asina poco poco ta mira cu ta piki e diferente proyectonan aki cu no a wordo

continua, pero cu ta importante pa desaroyo di turismo na Aruba. ‘Minister Dangui Oduber y mi
persona a bisa cu ‘We really do Care” pa San Nicolas y pesey lo continua cu e plannan aki. Pa
percura cu ta logra e meta pa haci San Nicolas un atraccion/ producto nobo pa Aruba.