Page 13 - min on feb 20,2015

Studiantenan na Utrecht hopi satisfecho cu informacion
encuanto seguro

Thursday, 19 February 2015 12:46
Comparti

Na Hogeschool di Utrecht un grupo di 54 studiante a presencia e anochi di informacion organisa pa
Gabinete di Minister Plenipotenciario. Presente tabata tambe Minister Plenipotenciario Alfonso
Boekhoudt y e mentor pa Utrecht Eddy Geerman.
Mescos cu e encuentronan anterior e studiantenan a haya un presentacion door di Wilke van Driel di
InsureToStudy tocante e seguro nobo den cual ela splica detayadamente loke e pakete di seguro ta encera
pa e studiantenan Arubiano cu un Arubalening. Sra. Van Driel a bisa cu banda cu e seguro ta cubri
gastonan medico, manera dokter di cas, specialista, dientista y remedi, e pakete ta hopi mas amplio. Ta
asina cu InsureToStudy ta brinda un compensacion pa un bril di 500 euro pa aña. Tambe e seguro ta
cubri calamidad. Bou di esaki por compronde ora un familiar di e studiante yega na fayece, e seguro ta
zorg pa e studiante por bai Aruba mas pronto posibel. Esaki ta conta solamente pa un familiar den prome
grado cu ta mayornan y rumannan y tambe familiar den di dos grado, cu ta wela y welo.
Sra. Van Driel a segura e studiantenan cu kico cu pasa, nan ta segura y InsureToStudy ta disponibel pa
clarifica cualkier duda cu e studiante por encontra cerca un dokter of hospital.
Director interino di Gabinete di Aruba Shandra John a splica e cambionan tocante giua di studiantenan
door di mentornan. Desde prome di februari e mentornan ta guia unicamente e studiantenan den nan
prome aña. Tur studiante cu tin mas aña studiando ta cai directamente bou di departamento di
enseñansa di Gabinete di Aruba. Sra. John a splica cu esaki ta significa entre otro cu e studiantenan aki lo
mester entrega nan resultado di estudio directamente na Gabinete di Aruba. Studiantenan cu tin otro
pregunta of ta confronta otro problemanan por acudi na e departamento di Cuido Social of e
departamento huridico di Gabinete di Aruba.
Durante y na final di e programa tabata tin tur tempo pa e studiantenan por a lansa nan preguntanan,
papia y pidi informacion adicional na e representantenan di InsureToStudy y funcionarionan di Gabinete
di Aruba.

http://www.24ora.com/local-mainmenu-5/92019-studiantenan-na-utrecht-hopi-satisfecho-cu-
informacion-encuanto-seguro