Page 26 - Diario

PAGINA 26
Estilo, Salud, Moda y Beyeza
Tienda di Hagemyer awor mihor
remodela cu nunca
ORANJESTAD (AAN):
Diabierna ultimo a tuma lugar
e re apertura di e tienda di
Hagemyer na Avenida Milio
Croes 114.
Hagemyer a habri su
portanan na aña 1977 y ta
conosi pa su amplio surtido di
appliances y muebles di bon
calidad y servicio exelente.
E tienda a sera su porta dia
24 di September ultimo pa
un renobacion completo di
e tienda. E contractor Eljo
a haja e tarea pa transforma
e tienda den cinco siman di
tempo. Y hunto cu e team di
Hagemyer y su manager Sixta
a prepara pa un reapertura cu
liñanan nobo di muebles di
Ashley y LA-Z Boy y tambe
un Sleep Gallery cu matras y
cama.
Nan a cuminsa di kita tur
cos for di e paden di e tienda,
despues nan a cuminsa cu
construkshon di e banjonan,
cushina y oficina nobo.
Mientrastanto tambe e
vloer a worde cambia y e
murayanan a haja un finish
nobo. Despues a worde arma
un interior completamanente
nobo cu reki y gondola nobo y
mesanan special pa acomoda
e selekshon nobo di tablets,
laptops y smart phones di
Samsung y Apple, Acer, Blue
y mas.
Hagemyer a bin cu un
Gallery nobo di LA-Z Boy
recliners y sofa sets super
DIARIO
comodo y colorido, tambe tin
un Sleep Gallery cu matras di
Serta y cu cama cu ta ahusta
cu coriente pa sinta
mas ariba of pa lanta
bo pianan. Ashley
tambe a augmenta
su presencia cu
un surtido mas
amplio di dining
rooms, sofas, set di
cama, recliners y
asesorios.
Naturalmente
a keda cu un
colekshon grandi
di frigidaire, stove,
washer, dryer, airco
y aparato chiquito
pa den cushina
di e marcanan
renombra manera
GE, Whirlpool,
Samsung, Panasonic y mas.
Algo masha bunita ta e TV
wall nobo, cu ta un muraya
cu tur e televisionan mas
nobo, LED smart di 24 te
cu 70 inch. Mientras cu a
traha riba e tienda, tambe a
traha riba un logo nobo y a
amplia e posibilidadnan di
paga cu facilidad di credit te
cu 24 luna. Nan tin credito
instantanjo cu tiki placa na
man.
Special pa e apertura a bin
un delegashon for di Merca
di Unicommer y di Ashley.
Di Unicommer, e managing
director Unicommer
Caribbean Sr Mario Guerrero
y e Sr Felix Siman managing
director Dutch Caribbean y
di Ashley, Sr Chuck Spang e
President International Sales
and Operations.
Pa celebra e reapertura di
Hagemyer, tambe a haci un
bunita donashon di 10 mil
Florin na e stichting Ban uni
man pa cria nos muchanan
cu ta yuda duna mucha den
nesesidad cu cuminda tur dia.
E donashon ta haci possible pa
yuda 30 mucha un aña largo.
Mas cu claro e fundashon a
keda sumamente contento cu
donashon aki.
DIAMARS 3 NOVEMBER 2015
Masha dushi mes
Un amigo di mi yama Cedricus (no ta su nomber di ber-
dad) tin e custumber cu ora hende puntre “con ta?” e semper ta
contesta “masha dushi mes!” Prome mi tabata bou di e impresion
cu Cedricus ta gosa di loke yama na Frances: “Joie de vivre” (na
Hulandes “levensvreugde”) of alegria di bida.
Durante di añanan di nos amistad, poco poco mi a cum-
insa comprende cu ora cu e expresa “masha dushi mes”, p’e e kier-
men algo mucho mas fuerte cu esey.
Particularmente, mi a ripara cu te hasta ora algo ta bay-
endo robes y e ta cunsumi of tin mal beis toch semper cosnan ta
“masha dushi mes!” Mi a bin realisa p’e “masha dushi mes” kier-
men mucho mas cu “alegria di bida” pero ta un expresion di su
tremendo gratitud pa tur cos den su bida, mas ainda e bendicion di
ta na bida. Cu e palabranan “masha dushi mes” Cedricus ta expresa
su actitud di gratitud na bida. For di dia cu mi a comprende esaki
mi tambe a adopta e palabranan aki cu continuamente ta baila den
mi mente.
Kico cu pasa mi ta recorda mi mes cu bida ta “masha du-
shi mes” y con afortuna nos ta. Masha dushi mes ta e recordatorio
tur dia cu nos mester tin un actitud di gratitud.
Hopi hende ta puntra mi ta unda mi a saca e frase aki cu
tur ora ta resalta den mi articulonan. Na Januari 2010 despues cu
un teremoto masha fuerte a asota Haiti mi a manda un articulo den
corant cu e nomber “UN ACTITUD DI GRATITUD”. E articulo ta
splica entre otro lo siguiente:
“E situacion di Haiti realmente ta pone hende pensa y
purba di pone e realidad cu nos ta bibando aden den perspectiva.
Pa por comprende loke mi kiermen, lo ta bon pa comprende kico
Haiti tawata pasando aden prome cu e teremoto cu a yega 7.0 ariba
e escala di Richter. Haiti tin un poblacion di 9 miyon habitante di
cual 80% ta sin trabou. Den e ultimo dos decada e la pasa den su
pio situacion economico den su historia. 75% di e muchanan no ta
bay school, mita no ta vacuna y 90% di nan ta sufri di malesanan
manera parasito intestinal. Mas cu 60% di e poblacion no tin acceso
na salubridad publico y aproximadamente 1 den cada 16 persona ta
contagia cu e virus di HIV/AIDS. Hopi hende ta sufri di Tuber-
culosis y Malaria. Haiti ta e pais mas pober den nos hemisferio y
mayoria di Haitiano ta biba ariba menos di $2.00 pa dia. Poco mas
cu mita di e poblacion por skirbi y lesa. Asina mes, e pueblo di
Haiti ta conoci pa su positivismo, su fe grandi, su sobrevivencia y
su speransa.
Pensando e bon, nos na Aruba ta hopi afortuna. Compara
cu otronan rond mundo manera esunnan cu ta biba na Haiti nos ta
den un paraiso. Mayoria di nos tin trabou, nos tin cosnan material,
nos tin nos famia, nos tin nos amigonan, nos tin nos salud.
Asina mes hopi di nos ta cana ta keha ariba tur cos, ta
cudisha, ta odia, ta rencora, ta haci redashi y otro cosnan negativo
- luga di tuma nos tempo pa ta agradecido pa loke nos tin compara
cu hopi otronan rond mundo cu no nada tin mes.
Porta proximo biaha luga di nos keha ariba nos pareha, nos
mama, nos tata, nos yiunan of nos rumannan, laga nos ta agradecido
cu nan ta cu nos ainda ... cuanto di esunnan cu a perde un di nan
sernan keri awe lo tin e gran deseo di pasa maske ta 5 minuut mas
cu nan.
Proximo biaha cu e cuminda cu bo ta comiendo no ta
smaak dje bon ey, luga di keha ariba dje, pensa cuanto hende rond
mundo tin hopi dia sin come y lo tin gana di un pida pan blanco
seco mes.
Proximo biaha cu nos pensa di haci redashi, di cudisha, di
odia, di rencora, di ta jaloers, di tin envidia of di pensa ariba tuma
vengansa, porta nos por considera pa uza nos emocion humano y
dirigi’e na algo mas positivo.
Porta nos por considera di tin un actitud di gratitud y gradici nos
Creador pa tur e cosnan bon cu nos tin, pa tur e cosnan cu tur dia
nos ta bendiciona di tin.” Di realisa y aprecia cu compara cu hopi
otro, bida ta MASHA DUSHI MES!