Page 30 - ATA-JUNI24,2015

Expectativanan ta hopi halto pa e Aruba Summer Music
Festival

Publication: Wednesday, 24 June 2015. Categoria: General

ORANJESTAD (AAN): Faltando solamente un par di dia pa inicio di e Aruba Summer Music
Festival expectativanan ta hopi halto pa e gran evento aki tanto local como internacionalmente.

Relacionista publico di e evento, Darren van Ommeren, a indica cu diaranson mayoria di grupo
tecnico ta yegando, algun miembro di prensa internacional tambe, sin laga afor nos bishitantenan
cu ta bin specialmente pa e e festival.

Tambe el a informa cu e promocion riba nivel internacional tabata tremendo, tur caminda nan a
worde bon ricibi y esaki ta un indicacion clave cu Aruba ta conta cu un bon respaldo di prensa
internacional; mas ainda si mira e cobertura cu e Aruba Summer Music Festival tin y ta bay tin
den varios di e medionan di comunicacion internacional. Prensa internacional cu a confirma nan
presencia ta proveniente di Colombia, Venezuela, Argentina, Inglatera, Hulanda, Surinam, entre
otro paisnan.

Darren van Ommeren a conta cu tur artista cu lo ta presente na nos isla ta promoviendo e evento
a traves di nan social media, un festival cu un escenario di un taya grandisimo y un espectaculo
tremendo.

Tur presente lo bay tin un bon bista riba escenario for di tur angulo, sonido lo ta uno espectacular
y ademas lo tin dos screen banda di e escenario.

Relaciona cu e anochi local, e relacionista publico a indica cu e concierto ta cuminsa pa 8or di
anochi na Aruba Entertainment Center y lo finaliza entre 12or pa 12:30 anochi. Cada banda cu lo
ta presentando e anochi aki a prepara nan set na nan forma, es decir, publico lo bay haya un
variacion di musica completo mirando e variedad di bandanan manera ta N-Fuzion, Tsunami, Le
Groove, Robert y su Solo Banda Show y D’Licious.

Kofung Ho di High Performance a indica cu nan ta trahando conhuntamente cu Elite y Thunder
N Lighting pa haci Aruba Summer Music Festival mas grandi posibel y esaki lo bira esun di mas
grandi cu a yega di tuma lugar na Aruba.